काठमाडौँ । आगामी बिहीबार र शुक्रबार देशका विभिन्न पहाडी तथा हिमाली क्षेत्रमा वर्षाको सम्भावना रहेको छ भने तराईका भूभागमा गर्मी बढ्ने पूर्वानुमान गरिएको छ।
जल तथा मौसम विज्ञान विभाग अन्तर्गतको मौसम पूर्वानुमान महाशाखाका अनुसार बिहीबार कोशी, बागमती र गण्डकी प्रदेशका हिमाली तथा पहाडी क्षेत्रका केही स्थानमा मेघगर्जन र चट्याङसहित वर्षा हुन सक्ने सम्भावना छ।
यस्तै मधेस, लुम्बिनी, कर्णाली र सुदूरपश्चिम प्रदेशका हिमाली तथा पहाडी भूभागका थोरै स्थानमा पनि वर्षाको अनुमान गरिएको छ। बागमती र गण्डकी प्रदेशका तराई क्षेत्रसमेत यस मौसम प्रणालीबाट प्रभावित हुन सक्ने महाशाखाले जनाएको छ।
शुक्रबार देशभर सामान्यदेखि आंशिक बदली रहने पूर्वानुमान गरिएको छ। गण्डकी, लुम्बिनी, कर्णाली तथा सुदूरपश्चिम प्रदेशका विभिन्न पहाडी र हिमाली स्थानमा मध्यम वर्षाको सम्भावना रहेको छ। साथै कोशी, मधेस र बागमती प्रदेशका तराई क्षेत्रमा समेत केही स्थानमा मेघगर्जन र चट्याङसहित पानी पर्ने अनुमान गरिएको छ।
महाशाखाले बिहीबार विशेष गरी सुदूरपश्चिम र लुम्बिनी प्रदेशका तराई क्षेत्रमा तातो महसुस हुने जनाएको छ। त्यस्तै शुक्रबार सुदूरपश्चिम, कर्णाली र लुम्बिनी प्रदेशका तराई तथा पहाडी भूभागसहित अन्य केही तराई क्षेत्रमा हावाहुरी चल्ने सम्भावना रहेको उल्लेख गरिएको छ।
