काठमाडौँ । अध्यागमन विभागले वैदेशिक रोजगारीमा जाने नेपाली श्रमिकले त्रिभुवन अन्तर्राष्ट्रिय विमानस्थलबाट प्रस्थान गर्दा अनावश्यक थप कागजात तथा बिल/रसिद पेस गर्न नपर्ने स्पष्ट पारेको छ ।
शुक्रबार सार्वजनिक सूचना जारी गर्दै विभागले वैदेशिक रोजगार विभागको अघिल्लो सूचनापछि देखिएको अन्योलप्रति ध्यानाकर्षण भएको जनाएको हो । श्रमिकसँग विमानस्थलस्थित अध्यागमन कार्यालयमा अतिरिक्त कागजात मागिएको भन्ने विषय सार्वजनिक भएपछि विभागले औपचारिक स्पष्टोक्ति दिएको हो ।
विभागका अनुसार नेपाल सरकार, गृह मन्त्रालयको मन्त्रिस्तरीय निर्णय तथा प्रचलित अध्यागमन कानुनबमोजिम वैध भिजिट भिसामा विदेश जाने नेपाली नागरिकका लागि कम्तीमा ६ महिना म्याद भएको राहदानी, गन्तव्य मुलुकको हवाई टिकट र सम्बन्धित देशको भिसा भए पुग्ने व्यवस्था छ ।
त्यस्तै, वैदेशिक रोजगारीमा जाने श्रमिकका हकमा वैदेशिक रोजगार विभागबाट जारी गरिएको श्रम स्वीकृति र राहदानीजस्ता न्यूनतम आवश्यक कागजात पर्याप्त हुने विभागले जनाएको छ । यसबाहेक अध्यागमन कार्यालयमा थप कागजात वा बिल/रसिद पेस गर्न नपर्ने स्पष्ट पारिएको छ ।
विभागले अनावश्यक कागजात माग्ने वा सेवाग्राहीलाई झन्झट हुने अवस्था सिर्जना नगर्न सम्बन्धित पक्षलाई आग्रह पनि गरेको छ ।
