काठमाडौँ । खाना पकाउने एलपी ग्यास आपूर्तिमा देखिएको दबाबका कारण उपभोक्ताहरू वैकल्पिक ऊर्जामा आधारित चुलोतर्फ आकर्षित हुँदै गएको देखिएको छ। यससँगै विद्युतीय चुलोको आयात उल्लेख्य रूपमा बढेको छ।
भन्सार विभागका अनुसार चालु आर्थिक वर्ष २०८२/८३ को पहिलो आठ महिनामा (साउनदेखि फागुन मसान्तसम्म) कुल १ लाख ४७ हजार ८ सय ६४ थान विद्युतीय चुलो नेपाल भित्रिएका छन्।
आयातित चुलोमध्ये सबैभन्दा बढी हिस्सा इन्डक्सन चुलोले ओगटेको छ। सो अवधिमा १ लाख ४ हजार ७ सय १७ थान इन्डक्सन चुलो आयात भएको तथ्यांकले देखाउँछ।
त्यस्तै, इन्फ्रारेड प्रविधिका चुलोको आयात पनि उल्लेख्य रहेको छ। समीक्षा अवधिमा ४२ हजार २ सय १८ थान इन्फ्रारेड चुलो भित्रिएको छ भने अन्य प्रकारका विद्युतीय चुलो भने ९ सय २९ थान मात्र आयात भएका छन्।
आर्थिक पक्षलाई हेर्दा, विद्युतीय चुलो आयातका लागि ठूलो परिमाणमा विदेशी मुद्रा बाहिरिएको छ। आठ महिनामा आयात भएका यी चुलोहरूको कुल मूल्य करिब ३० करोड ४१ लाख १२ हजार रुपैयाँ बराबर रहेको छ।
प्रकारगत रूपमा हेर्दा इन्डक्सन चुलोको आयात मूल्य मात्र २२ करोड २७ लाख ४ हजार रुपैयाँ पुगेको छ भने इन्फ्रारेड चुलोको मूल्य ७ करोड ६७ लाख ७ हजार रुपैयाँ रहेको छ। यसैबीच, यी वस्तुहरूको आयातबाट सरकारले करिब ४ करोड ३३ लाख ७ हजार रुपैयाँ राजस्व संकलन गरेको भन्सार विभागले जनाएको छ।