काठमाडौँ । गैरआवासीय नेपाली संघ (एनआरएनए) को १२औँ महाधिवेशनबाट नयाँ कार्यसमिति गठन गरिएको छ। महाधिवेशनले विभिन्न पक्षबीच समन्वय कायम गर्दै विस्तृत र समावेशी कार्यसमिति निर्माण गर्ने उद्देश्य राखेको बताइएको छ।
निर्वाचन समितिको मंगलबार राति सचिवालयमा सम्पन्न घोषणाअनुसार डा. हेमराज शर्मा अध्यक्ष पदमा सर्वसम्मत रूपमा चयन भएका छन्। वरिष्ठ उपाध्यक्षमा रोविन शेरचन निर्वाचित भएका छन् भने उपाध्यक्ष पदमा करिब दुई दर्जन सदस्यहरू चयन भएका छन्, निर्वाचन समितिका सदस्य टिबी कार्कीले जानकारी दिएका छन्।
त्यसैगरी महासचिवमा डा. चिरञ्जीवी खड्का, उपमहासचिवमा ६ जना, सचिवमा १२ जना सदस्य सर्वसम्मत रूपमा निर्वाचित भएका छन्। कोषाध्यक्षमा कृष्णप्रसाद तिमल्सिना र प्रवक्तामा सोम सापकोटा चयन भएका छन्।
कार्यक्रममा निवर्तमान अध्यक्ष डा. बद्री केसी र महेश श्रेष्ठ, पूर्वअध्यक्ष आरके शर्मा, विनोद कुँवर लगायतका वरिष्ठ नेताहरूको पनि उपस्थिति रहेको थियो। शनिबारदेखि सुरु भएको महाधिवेशन सोमबार नयाँ नेतृत्वको घोषणासहित सम्पन्न भएको हो।