काठमाडौँ । प्रतिनिधि सभा सदस्य निर्वाचनको पूर्वसन्ध्यामा निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले सम्पूर्ण मतदातालाई आत्मविश्वासका साथ मतदानमा सहभागी हुन अपिल गरेका छन्।
निर्वाचन सञ्चालन तथा व्यवस्थापनका आवश्यक तयारी सम्पन्न भइसकेको जानकारी दिँदै उनले तोकिएको मिति २०८२ फागुन २१ गते बिहीबार आ-आफ्ना मतदान केन्द्रमा उपस्थित भई मताधिकार प्रयोग गर्न आग्रह गरे। निर्वाचनलाई प्रतिनिधिमूलक शासन व्यवस्थाको आधार मानेका उनले नागरिकले रोजेका प्रतिनिधिमार्फत राज्य सञ्चालन हुने प्रक्रियालाई वैधता प्रदान गर्ने संवैधानिक माध्यमका रूपमा मतदानलाई उल्लेख गरे।
उनका अनुसार संविधान र कानुनले तोकेको उमेर पूरा गरेका सबै नागरिक मतदाता हुन् र प्रत्येक मतको मूल्य समान हुन्छ। शासन प्रणालीको स्वरूप, नीति, नेतृत्व र सरकारको दिशानिर्देशन निर्धारण गर्ने आधार प्रत्येक मतदाताले खसाल्ने मत नै भएकाले लोकतान्त्रिक प्रणालीमा निर्वाचनलाई सर्वोपरि अभ्यासका रूपमा लिइन्छ।
आयोग स्वच्छ, स्वतन्त्र, निष्पक्ष र भयमुक्त वातावरणमा निर्वाचन सम्पन्न गराउन पूर्णरूपमा प्रतिबद्ध रहेको उनले स्पष्ट पारे। कुनै पनि अवाञ्छित गतिविधिले निर्वाचन प्रक्रियामा असर नपार्ने सुनिश्चितता गर्दै आस्था, विचार र सिद्धान्तका आधारमा स्वतन्त्र निर्णय गर्ने वातावरण निर्माणमा आयोग दृढ रहेको उनको भनाइ छ।
मतदानलाई नागरिकको स्वाभाविक अधिकार मात्र नभई जिम्मेवारीसमेत रहेको उल्लेख गर्दै उनले मतदाताको सक्रिय सहभागितालाई राजनीतिक चेतना, सामाजिक उत्तरदायित्व र नागरिक संलग्नताको उच्च अभिव्यक्तिका रूपमा व्याख्या गरे। सु-सूचित र जिम्मेवार मतदानले शासन प्रणालीप्रति नागरिक अपनत्व सुदृढ गर्ने विश्वाससमेत उनले व्यक्त गरेका छन्।
