काठमाडौँ । सरकारले मध्यपूर्वमा कार्यरत नेपाली नागरिकको सुरक्षालाई प्राथमिकतामा राख्दै ‘र्यापिड एक्सन टिम’ गठन गर्ने तयारी गरेको छ।
परराष्ट्र मन्त्रालयले आइतबार पत्रकार सम्मेलनमार्फत उक्त टिमको स्थापना प्रक्रिया सुरु भएको जानकारी दिएको हो।
परराष्ट्र मन्त्रालयका सचिवको संयोजकत्वमा गठन हुने यो टिममा श्रम तथा रोजगार मन्त्रालय, गृह मन्त्रालय लगायत सम्बन्धित अन्य निकायका प्रतिनिधिहरू समावेश हुनेछन्।
परराष्ट्र मन्त्रालयका अधिकारी कृष्णप्रसाद ढकालका अनुसार, उक्त टिमले मध्यपूर्वको घटनाक्रम नजिकबाट अनुगमन गर्ने, आवश्यक निर्णय छिटो लिन सक्ने, सम्बन्धित निकायसँग समन्वय गर्ने र आवश्यक परेमा त्यहाँ रहेका नेपाली नागरिकलाई सहयोगका लागि तत्काल कदम चाल्ने कार्यभार सम्हाल्नेछ।
ढकालले भने, “मध्यपूर्वमा रहेका नेपालीहरूको सुरक्षालाई सरकार उच्च प्राथमिकतामा राखेको छ। यही उद्देश्यका लागि र्यापिड एक्सन टिम गठन गर्ने निर्णय गरिएको हो।”
