काठमाडौँ। टर्कीको इस्तानबुलबाट काठमाडौँका लागि उडेको टर्किस एयरलाइन्स को विमान अवतरणको अन्तिम चरणमा प्राविधिक जटिलता देखिएपछि निर्धारित गन्तव्यमा अवतरण नगरी बांङ्लादेशतर्फ मोडिएको छ।
त्रिभुवन अन्तर्राष्ट्रिय विमानस्थल स्थित नागरिक उड्डयन कार्यालयका अनुसार टीके-७२६ नम्बरको उडान काठमाडौँ अवतरण गर्ने क्रममा समस्या देखिएपछि ‘ओभरसुट’ गर्दै वैकल्पिक गन्तव्य रोजिएको हो। ए३३० सिरिजको वाइडबडी विमान बुधबार बिहान ११:१० बजे अवतरण गर्ने तालिका रहेको थियो भने १०:५६ बजे आसपास आइपुग्ने अनुमान गरिएको थियो।
उक्त विमान केही समयपछि बांङ्लादेशको ढाका मा सुरक्षित अवतरण गरेको जनाइएको छ।
यसअघि पनि सोही एयरलाइन्सको जहाज माघ २१ गते काठमाडौँबाट उडेको केही मिनेटमै दायाँ इन्जिनमा समस्या देखिएपछि भारतको कोलकाता तर्फ मोडिएको थियो।
यसैबीच, थाई एयरवेज को बैंकक-काठमाडौँ उडान भने मौसमका कारण विमानस्थल वरिपरि तीव्र हावा चलेपछि केही समय आकाशमै होल्ड गरिएको थियो। पछि उक्त विमान पनि सुरक्षित रूपमा काठमाडौँमा अवतरण गरेको विमानस्थल कार्यालयले जनाएको छ।