काठमाडौँ । प्रतिनिधि सभा सदस्य निर्वाचनलाई लक्षित गर्दै काठमाडौँ उपत्यकामा निर्वाचन प्रयोजनका लागि भर्ना गरिएका अस्थायी प्रहरी (निर्वाचन प्रहरी) ले गस्ती सुरु गरेका छन्।
फागुन २१ गते तय भएको निर्वाचनको सुरक्षा व्यवस्थापनलाई सुदृढ बनाउन उनीहरूलाई सडकमा परिचालन गरिएको हो।
यसअघि महाशिवरात्रि पर्वका अवसरमा पशुपतिनाथ मन्दिर क्षेत्रको सुरक्षामा समेत निर्वाचन प्रहरी परिचालन गरिएको थियो। करिब १० दिनको तालिमपछि उनीहरूलाई जिम्मेवारी दिइएको हो। तालिम एक साताअघि सम्पन्न भए पनि आवश्यक बन्दोबस्ती सामग्री (लौरो, सिट्टी, पोशाक, जुत्ता) तयारीमा ढिलाइ हुँदा फिल्डमा परिचालन हुन केही समय लागेको जनाइएको छ। हाल आवश्यक सामग्री उपलब्ध भइसकेपछि गस्ती कार्य सुरु गरिएको छ।
आगामी निर्वाचनका लागि समग्रमा ३ लाख ३३ हजार ९८० सुरक्षाकर्मी परिचालन गर्ने योजना रहेको छ। जसअनुसार नेपाली सेनाका ७९ हजार ७२७, नेपाल प्रहरीका ७५ हजार ५९७, नेपाल प्रहरीको कमाण्डमा रहने १ लाख ३० हजार ९८० निर्वाचन प्रहरी, सशस्त्र प्रहरी बल नेपालका ३४ हजार ५७६ तथा सोही निकायको मातहत रहने १५ हजार ११० निर्वाचन प्रहरी परिचालन हुने छन्।
त्यसैगरी १ हजार ९२१ गुप्तचर परिचालन हुने जनाइएको छ। चारवटै सुरक्षा निकाय तथा निर्वाचन प्रहरीसमेत गरी उल्लेखित संख्यामा सुरक्षाकर्मी निर्वाचन अवधिभर खटिने योजना रहेको छ।
