नेपाली बजारमा आज पनि सुनचाँदीको मूल्यमा अर्को कीर्तिमान कायम भएको छ । आज एकैदिन प्रतितोला तोला ९ हजार ५ सयले बढेर सूनको मुल्य हालसम्मकै उच्च भएको हो ।
नेपाल सुनचाँदी व्यवसायी महासङ्घका अनुसार सुनको मूल्य प्रतितोला तीन लाख १८ हजार ८०० रुपैयाँ कायम भएको छ । त्यस्तै चाँदीको मूल्य पनि ४३० रुपैयाँले बढेर ७ हजार ३०० कायम भएको छ । मङ्गलबार सुनको मूल्य तीन लाख ९ हजार ३०० र चाँदीको मूल्य ६ हजार ८७० रुपैयाँमा कारोबार भएको थियो । नेपालमा मात्रै होईन अन्तराष्ट्रि बजारमा पनि पछिल्लो समय सुनको मुल्यमा व्यापक वृद्धि भइरहेको छ ।
आज अन्तरराष्ट्रिय बजारमा एक औँस सुन पाँच हजार २०० र चाँदी १ सय ११ अमेरिकी डलरमा कारोबार भइरहेको अन्तराष्ट्रिय संचार माध्यमले जनाएका छन् । ग्रीनल्याण्डको विषयलाई लिएर अमेरिका र उत्तर एट्लान्टिक सन्धि संगठन (नेटो) बिच बढेको तनावले विश्वमा वित्तीय र भू–राजनीतिक अनिश्चय थपेका कारण पनि सुनको मुल्य बढेको बताईएको छ । जसका कारण लगानीकर्ताहरू सुनतर्फ आकर्षित भएका छन् ।
सुनको माग बढ्नुमा अन्य कारणहरू पनि जिम्मेवार रहेको बताईन्छ । अस्वाभाविक रूपमा मुद्रास्फीति बढ्नु, अमेरिकी डलर कमजोर बन्नु र विश्वभरका केन्द्रीय बैंकहरूले सुनको सञ्चिति बढाउनुले पनि मूल्य लगातार उकालो लागेको मानिन्छ ।
त्यसबाहेक अलावा युक्रेन र गाजामा जारी युद्ध तथा वासिङ्टनले भेनेजुएलाका राष्ट्रपति निकोलस मदुरोलाई नियन्त्रणमा लिएको घटनाले सिर्जना गरेको तनावले पनि सुनको मूल्य बढाउन मद्दत गरेको बताईन्छ । सुनसँगै चाँदीको मूल्य पनि अन्तराष्ट्रिय बजारमा बढ्दो क्रममा छ ।
