तनहुँ । तनहुँ, चितवन र नवलपुरको संगमस्थल देवघाट धाममा माघे सङ्क्रान्ति मेला भर्न भक्तजनको चहलपहल सुरु भएको छ । देवघाट धाममा बुधबार रातिदेखि नै भक्तजन आउन थालेका हुन् ।
बुधबार दिउँसो वेणीसंगममा लिंगो गाडेर माघे सङ्क्रान्ति मेलाको शुभारम्भ गरिएको थियो । बुधबार रातिदेखि नै देवघाटमा भक्तजनको भीड बढेको देवघाट क्षेत्र विकास समितिका कार्यकारी निर्देशक सदन बरालले जानकारी दिए ।
यस वर्ष तीन लाख भक्तजनले माघे सङ्क्रान्ति मेला भर्ने अनुमान गरिएको बरालले बताए । माघ महिनाभर देवघाट धाममा स्नान गर्नाले ठूलो पुण्य प्राप्ति हुने धार्मिक मान्यता र विश्वास रहेको छ । साथै पवित्र त्रिशूली नदी र कालीगण्डकी नदीको देवघाटमा मिलन पनि मकर सङ्क्रान्तिको दिन नै भएको मानिन्छ ।
मेलाको अवधिमा सवारीसाधन चितवनको रामनगर हुँदै देवघाट वा रामनगर–ठिमुरा हुँदै देवघाट वा दासढुंगा भएर देवघाटबाट प्रवेश गर्ने र फर्कँदा देवघाट–बागेश्वरी हुँदै आँपटारी भएर फर्कने व्यवस्था मिलाइएको बरालले जानकारी दिए ।
नवलपुरतर्फका भक्तजनहरू हर्दीको कालीगण्डकीको पुल तरेर देवघाट आउन सक्छन् । साथै मुग्लिङतर्फबाट देवघाट आउने सवारीसाधनलाई दासढुंगाबाट सिधै देवघाटधाम प्रवेश गर्ने र फर्कँदा सोही बाटोबाट फर्किने व्यवस्था मिलाइएको छ ।
चितवनतर्फ सवारीसाधनको पार्किङका लागि साना सवारीसाधनको लागि सीताराम संस्कृत माविको कम्पाउण्डभित्र व्यवस्था मिलाइएको छ भने ठूला सवारीसाधन (बस, मिनीबस, माइक्रो) आदिको पार्किङ व्यवस्था दाहसंस्कार स्थल प्रवेशद्वार (चन्द्रलोक स्वर्गद्वार)देखि उत्तर पूर्व क्षेत्रमा रहेको बसपार्कमा सवारीसाधनलाई सहज रूपमा पार्किङको व्यवस्था मिलाइएको छ ।
तनहुँतर्फ पैदल मार्गबाट प्रवेश गर्दा पुलको मुख, हरिहर चोक, हरिहर मन्दिर, गलेश्वर चोक हुँदै वेणीसंगम र फर्कँदा वेणीसङ्गम, गलेश्वर आश्रम, गलेश्वर चोक, चक्रवर्ती मन्दिर, महेश सन्यास आश्रम, टाउन चोक, हरिहर चोक हुँदै पुलको मुख निस्कने रुट कायम गरिएको छ ।
देवघाट क्षेत्र विकास समितिले तीर्थयात्रीहरूको यात्रा सरल, सहज, सुविधाजनक र सुरक्षित होस् भन्ने उद्देश्यले तनहुँ, चितवन र नवलपुरका प्रमुख जिल्ला अधिकारी, नेपाली सेना, नेपाल प्रहरी, सशस्त्र प्रहरी, भरतपुर महानगरपालिकाका प्रमुखसँग समन्वय गरेको विकास समितिका अध्यक्ष डा. ईश्वरीराज लौडारीले जानकारी दिए । उक्त दिन ३०० भन्दा बढी सुरक्षाकर्मी परिचालन गरिनेछ ।
तीर्थस्थलमा धूम्रपान, मांस–मदिरा एवं सुर्तीजन्यपदार्थहरु निषेध गरिएको छ । तसर्थ उक्त वस्तुहरू बिक्री वितरण ओसारपसार एवं सेवन कार्य नगरी सहयोग पुर्याउन आग्रह गरिएको छ । वेणीमा नुहाउने स्नान क्षेत्रलाई डोरी लगाएर छुट्याइएको छ । सो क्षेत्रभन्दा बाहिर गहिरोमा गएर नुहाउन खतरा हुने संकेत दिइएको छ ।
