झापा । जेन जेड आन्दोलनका क्रममा आगजनीमा परेका अर्जुनधारा, मेचीनगर, कनकाईलगायत जिल्ला अधिकांश पालिकाले अत्यावश्यक सेवा सुरुआत गरेका छन् । गत भदौ २४ गते जिल्लाको १५ पालिकामध्ये हल्दिबारी गाउँपालिका बाहेक अरु सबै पालिकामा आगजनी र तोडफोड भएका थिए । त्यसयता पालिकाहरू बन्द थिए ।
अर्जुनधारा नगरपालिकाका प्रमुख प्रशासकीय अधिकृत अनोजकुमार घिमिरेले नगरका ११ वटै वडा कार्यालय र नगर कार्यपालिकाको कार्यालयबाट अत्यावश्यकीय सेवा सुरु भइसकेको बताए। “नगरपालिकाको सेवा केही दिनअघि नै सुरु गरिएको थियो,” उनले भने “सबै वडा कार्यालयको सेवा पनि आइतबारदेखि थालेका छौँ । जनताको प्रत्यक्ष सरोकारसँग जोडिएका सेवाहरू अब सुचारु भएका छन् । जुन तत्काल नहुँदा पनि हुन्छ, त्यस्तो सेवा चाहिँ अहिले दिन सक्दैनौँ ।”
नागरिकता सिफारिस, घरजग्गा पास, चार किल्ला सिफारिस, राजस्व संकलन लगायतका सेवा सुरु भएको हो । नगरपालिकाले सामाजिक सुरक्षा भत्ता र कर्मचारीको तलब निकासा गरेको छ । ज्येष्ठ नागरिक, एकल महिला, अपांगता भएका व्यक्ति लगायतको सामाजिक सुरक्षा भत्ता बैंक खातामा पठाइसकिएको उनले बताए ।
नगरपालिकामा ११ वडा छन् । जेन जेड आन्दोलनका क्रममा नगरपालिका र सबै वडा कार्यालयमा आगजनी र तोडफोड भएको थियो । भग्नावशेषहरुको सरसफाइ र मर्मत गरेर नगरपालिका कार्यालयको सभा हलमा एउटै थलोबाट सबै वडाको एकीकृत सेवा सञ्चालन गरिएको उनले बताए ।
कनकाई नगरपालिकाले आगजनीमा परेको भवनबाटै आज सेवा सुरु गरेको छ । नगरमा नौ वटा वडा कार्यालय छन् । सबै वडा कार्यालयमा जेन जेड आन्दोलनमा आगजनी र तोडफोड भएका थिए ।
नगरपालिकाबाट न्यूनतम् आवश्यक सेवा प्रदान गर्न थालिएको र दुई दिनपछि सबै वडाले आफ्नै वडा कार्यालयबाट वडावासीलाई सेवा दिने गरी तयारी भइरहेको कनकाई नगरपालिकाका प्रमुख प्रशासकीय अधिकृत नारायण न्यौपानेले बताए ।
नगरका छ हजार नागरिकले सामाजिक सुरक्षा भत्ता पाउने गरेका छन् । सामाजिक सुरक्षा कार्ड नवीकरण भएका सबैको भत्ता बैंक खातामा पठाइसकेको उनले जानकारी दिए । ध्वस्त भएको वडा कार्यालयमा सरसफाइ सकेर विद्युत्, इन्टरनेट, फर्निचर, पानी लगायतको सुविधा पुर्याइएको उनले बताए ।
“आन्दोलनमा नगरपालिकाको मुख्य भवनको भूइँतला पूर्णरुपमा जलेको छ,” उनले भने “जलेको भागको खरानी पन्छाउँदै कार्यालय पुन:सञ्चालन गरेका छौँ । भवन प्रयोग गर्न उपयुक्त हो कि होइन भनेर प्राविधिक परीक्षण हुन बाँकी छ ।”
मेचीनगर नगरपालिकाको मुख्य प्रशासनिक भवन र १५ वटामध्ये १४ वटा वडा कार्यालय जेन जेड आन्दोलन क्रममा आगजनी र तोडफोड भएका थिए । नगरपालिकाले आइतबारदेखि आंशिक सेवा प्रारम्भ गरेको प्रमुख प्रशासकीय अधिकृत अग्निप्रसाद अधिकारीले बताए । “अति आवश्यक विषयलाई प्राथमिकता दिएर सेवा सुरु गरेका छौँ,” उनले भने “वडा कार्यालयबाट पनि सरसफाइ गरेर जनताको सेवा सुचारु गरिएको छ । हामी युद्ध स्तरमा काम गरिरहेका छौँ ।
‘बिर्तामोड नगरपालिका, कचनकबल गाउँपालिका र झापा गाउँपालिकाले सरसफाइ गरिरहेका छन् । भवन ध्वस्त भएको छ, कागजपत्र जलेर खरानी भएका छन्,’ बिर्तामोड नगरपालिकाका नगर प्रमुख पवित्रा महतरा प्रसाईँले भनिन्, “अत्यावश्यक सेवा पाँच दिनपछि सुचारु गर्छौँ ।”
