काठमाडौँ । मोरङको कारागार शौचालयभित्र महिला बन्दी मृत अवस्थामा भेटिएकी छन् ।
बुधवार बिहान बराहक्षेत्र नगरपालिका-६ घर भएकी ३२ वर्षीय राधिका भनिने राधा भट्टराई कारागारको शौचालयभित्र मृत भेटिएकी हुन् । महिला कैदी बन्दी राखिने सेलको शौचालयमा झुण्डिएको अवस्थामा फेला परेको जिल्ला प्रहरी मोरङले जनाएको छ ।
भट्टराईले २०८० माघ पहिलो साता २ छोरा र छोरीसहित सुनसरी-मोरङ सिँचाइ आयोजनाको नहरमा हाम फालेकी थिइन् ।
आफ्ना दुई नाबालक सन्तानसहित नहरमा हाम फालेकी उनी र एक बच्चाको उद्धार भएको थियो भने, एक जना बच्चाको मृत्यु भएको थियो।
आफ्नै बच्चाको मृत्यु भएपछि उनीमाथि कर्तव्य ज्यान मुद्दा चलेको थियो। सुनसरी जिल्ला अदालतले उनलाई २०८१ कात्तिक ७ गते २० वर्ष कैद सजाय सुनाएको थियो। उनी २०८० माघ ५ गतेदेखि विराटनगरस्थित मोरङ कारागारमा थिइन्।
