हुम्ला । बाक्लो हिमपातका कारण हुम्लाको नाम्खा गाउँपालिका–५ स्थित न्यालु लेक र वडा नं. ६ को नारा लेक हुँदै लिमी प्रवेश गर्ने सडक अवरुद्ध भएको छ। सडकमा तीन फिटभन्दा बढी हिउँ जम्दा लिमीको आवागमन असोजको पहिलो सातादेखि नै ठप्प छ।
लिमी–६ का वडाध्यक्ष पाल्जोर तामाङका अनुसार सडक अवरुद्ध हुँदा स्थानीयवासीलाई अत्यावश्यक कामका लागि समेत बाहिर जान कठिन भएको छ। बिरामी वा अन्य आपत्कालीन अवस्थामा हेलिकोप्टर चार्टर गर्नुपर्ने बाध्यता रहेको उनले बताए।
दसैँ–तिहार नजिकिँदै गर्दा ताक्लाकोटमा रहेका हुम्लाका स्थानीयसमेत घर फर्किन समस्या भएको उनको भनाइ छ। वडाध्यक्ष तामाङले न्यालु र नारा लेकमा जमेको हिउँ तत्काल पन्छाएर सडक सञ्चालन गर्न सम्बन्धित निकायसँग माग गरेका छन्।
लिमीका होटल व्यवसायी प्रभावित
लिमी प्रवेश गर्ने प्रमुख नाकामध्ये करिब पाँच हजार मिटर उचाइमा रहेको न्यालु लेक पनि हो। सडक अवरुद्ध हुँदा लिमीका तिल गाउँका १८, हल्जीका ९०, जाङका तीन र तुम्लिङका ११ जना होटल व्यवसायी प्रभावित भएका छन्। ताक्चीमा सञ्चालित दुई होटल पनि सडक अवरुद्धका कारण प्रभावित भएका छन्।
सडक नचल्दा खाद्यान्न तथा दैनिक उपभोग्य सामग्रीको आपूर्तिमा समेत समस्या भएको स्थानीयले बताएका छन्।
सुनखानी प्रहरी चौकीमा पानी र दाउराको समस्या
हिमपातका कारण लिमीको सुनखानीमा रहेको प्रहरी चौकीमा कार्यरत प्रहरीसमेत समस्यामा परेका छन्। लगातार तीन दिनसम्म भएको हिमपातपछि चौकी आसपास करिब तीन फिट हिउँ जमेको छ।
दाउरा अभाव हुँदा खाना पकाउन तथा धारामा पानी जमेकाले खानेपानी व्यवस्थापनमा समेत कठिनाइ भएको वडाध्यक्ष तामाङले बताए। आवश्यक दाउरा र खाद्यान्न हल्जी गाउँबाट बोकेर ल्याउनुपर्ने अवस्था छ।
सडकमा हिउँ जमेपछि प्रहरी चौकीसम्म रासन तथा अन्य सामग्री पैदलै बोकेर पुर्याउनुपर्ने बाध्यता छ। सुनखानी प्रहरी चौकीमा प्रहरी सहायक निरीक्षकसहित १० जना कार्यरत छन्।
हल्जी गाउँमा फोरजी सेवा सञ्चालनमा रहेकाले सुनखानीका प्रहरीले दिनमा एकपटक करिब चार घण्टा पैदल हिँडेर हल्जी पुग्ने र त्यहाँबाट आवश्यक सूचना आदानप्रदान गर्ने गरेका छन्।
नारा लेकमा जेसिबी प्रयोग गर्नुपर्ने
चार हजार ६७० मिटर उचाइमा रहेको नारा लेकमा साढे तीन फिटसम्म हिउँ जमेको छ। हिउँका कारण हिल्सा–सिमकोट सडकखण्डसमेत अवरुद्ध भएको छ।
सशस्त्र प्रहरी बल सीमा सुरक्षा चौकीका सशस्त्र प्रहरी निरीक्षक केदार सापकोटाले जेसिबी प्रयोग नगरी सडकमा जमेको हिउँ पन्छाउन कठिन हुने बताए।
हिल्सास्थित मानसरोवर होटलकी सञ्चालक पेमा लामाले पनि नारा लेकको हिउँ तत्काल पन्छाएर यातायात सञ्चालन गर्न हिल्सा–सिमकोट सडक योजनासँग आग्रह गरेकी छन्।
हिल्सामा सशस्त्र प्रहरी, नेपाल प्रहरी, यारी नाका भन्सार कार्यालय, अध्यागमन कार्यालयका कर्मचारी, होटल व्यवसायी तथा केही स्थानीय व्यापारी बस्दै आएका छन्।
स्थानीयका अनुसार यस वर्ष विगत १५ वर्षयताकै पहिलोपटक हिल्सामा असोज १० गतेदेखि हिमपात भएको हो। यसअघि हिल्सामा कात्तिकपछि मात्रै बाक्लो हिमपात हुने गरेको उनीहरूको भनाइ छ। मौसममा आएको परिवर्तनका कारण यस वर्ष चाँडै हिमपात भएको स्थानीयको अनुमान छ।
दसैँ–तिहार नजिकिँदै गर्दा सडक सञ्चालन हुन नसक्दा ताक्लाकोटमा रहेका हुम्लाका स्थानीयलाई घर फर्किन समस्या भएको छ। स्थानीयवासीले लिमी र हिल्साका सडकमा जमेको हिउँ तत्काल पन्छाएर यातायात सेवा सुचारु गर्न सम्बन्धित निकायसँग माग गरेका छन्।
