काठमाडौँ । देशका विभिन्न क्षेत्रमा परेको अविरल वर्षासँगै आएको बाढी र पहिरोका कारण मुख्य राजमार्ग तथा सहायक सडकहरू प्रभावित भएका छन्। नेपाल प्रहरीले सार्वजनिक गरेको पछिल्लो विवरणअनुसार विभिन्न स्थानमा सडकमा पहिरो खस्नुका साथै बाढी र कटानका कारण धेरै सडकखण्डमा यातायात पूर्ण रूपमा अवरुद्ध भएको छ।
काठमाडौँ उपत्यका तथा बागमती प्रदेशका विभिन्न सडकमा पनि यातायात प्रभावित भएको छ। ललितपुरको कान्तिलोकपथ र टिकाभैरव–चारघरे सडकखण्ड पहिरोका कारण पूर्ण रूपमा बन्द भएका छन्। धादिङस्थित पृथ्वी राजमार्गको कृष्णभिर र चालिसेमा पहिरो पन्छाएर एकतर्फी यातायात सञ्चालनमा ल्याइए पनि वर्षा र पहिरोको जोखिमलाई मध्यनजर गर्दै धादिङ तथा आसपासका क्षेत्रमा अर्को सूचना जारी नभएसम्म आवागमनमा रोक लगाइएको प्रहरीले जनाएको छ।
रसुवाका मुख्य सडकहरू बाढीका कारण अवरुद्ध भएका छन्। मकवानपुरको हेटौँडा–भैँसे–भीमफेदी–फाखेल–काठमाडौँ सडकखण्ड पनि पहिरोका कारण पूर्ण रूपमा बन्द छ। काभ्रेपलाञ्चोकस्थित बीपी राजमार्गमा भने एकतर्फी रूपमा यातायात सञ्चालन भइरहेको प्रहरीले जनाएको छ।
कोशी प्रदेशमा पनि वर्षाका कारण सडक यातायात प्रभावित भएको छ। सोलुखुम्बुमा भारी वर्षाको सम्भावनालाई ध्यानमा राख्दै सिद्धिचरण लोकमार्गलगायतका सडकमा राति ८ बजेदेखि बिहान ६ बजेसम्म अत्यावश्यक सेवाका सवारीसाधनबाहेक अन्य सवारी तथा पैदलयात्रुको आवागमनमा रोक लगाइएको छ।
गण्डकी प्रदेशमा पहिरोका कारण सडक सञ्जाल थप प्रभावित भएको छ। मनाङको चामे–बेंसीसहर सडक, बागलुङको कालीगण्डकी करिडोर, म्याग्दीको बेनी–जोमसोम तथा बेनी–दरबाङ सडकखण्ड पूर्ण रूपमा अवरुद्ध भएका छन्।
त्यस्तै, मुस्ताङको जोमसोम–कोरला, पर्वतको मालढुङ्गा–बेनी, नवलपरासी पूर्वको कालीगण्डकी करिडोर, लमजुङको मध्यपहाडी लोकमार्ग र तनहुँको पृथ्वी राजमार्गअन्तर्गत घाँसीकुवा क्षेत्रमा पनि पहिरोका कारण यातायात सञ्चालन हुन सकेको छैन।
लुम्बिनी प्रदेशको गुल्मीस्थित कालीगण्डकी करिडोरसमेत पहिरोका कारण पूर्ण रूपमा अवरुद्ध भएको छ। कर्णाली प्रदेशमा कालिकोटको कर्णाली राजमार्गअन्तर्गत गगने खोला तथा मुगुको नाग्म–गमगढी सडकखण्डमा पहिरो खसेपछि यातायात ठप्प भएको प्रहरीले जनाएको छ।
अवरुद्ध सडक खुलाउन प्रहरी, स्थानीय प्रशासन तथा सम्बन्धित निकायले आवश्यक प्रयास गरिरहेका छन्। लगातार वर्षा भइरहेकाले सडक खुलाउने क्रममा समेत थप पहिरो र बाढीको जोखिम रहेको जनाइएको छ।
प्रहरीले वर्षाका कारण सडकको अवस्था जुनसुकै बेला परिवर्तन हुनसक्ने भएकाले अत्यावश्यक कामबाहेक जोखिमपूर्ण यात्रामा ननिस्कन तथा यात्रा गर्नुअघि सम्बन्धित क्षेत्रको सडकको अवस्थाबारे जानकारी लिन सर्वसाधारणलाई आग्रह गरेको छ।
