गण्डकी । फ्लाई दुबईले आगामी बुधबारदेखि सुरु गर्न लागेको दुबई–पोखरा–दुबई सीधा हवाई उडानलाई सफल र दिगो बनाउन पोखराका होटल तथा रेष्टुराँ व्यवसायीले छुट योजना सार्वजनिक गरेका छन् ।
पोखरा अन्तरराष्ट्रिय विमानस्थलबाट हुन लागेको अन्तरदेशीय उडानमा यात्रु तथा पर्यटकलाई आकर्षित गर्ने उद्देश्यले होटल र रेष्टुराँमा विशेष छुटको व्यवस्था गरिएको हो ।
होटल सङ्घ पोखराका अध्यक्ष लक्ष्मण सुवेदीका अनुसार फ्लाई दुबईबाट पोखरा आउने यात्रु तथा पर्यटकलाई पहिलो तीन महिनासम्म होटलमा २५ प्रतिशत छुट दिइनेछ । उक्त योजनामा हालसम्म ५० वटा होटल सहभागी भइसकेका छन् । सहभागी होटलको सङ्ख्या थपिने उनले बताए ।
उनका अनुसार छुट योजनामा पोखराका पर्यटकस्तरीय होटलका साथै केही तारे होटलसमेत समावेश छन् ।
बुधबार साँझ पहिलो उडानबाट दुबईदेखि पोखरा आउने यात्रुका लागि एक रातको आवास र भोलिपल्ट बिहानको खाजा निःशुल्क उपलब्ध गराइने सुवेदीले जानकारी दिए । पहिलो चरणमा तीन महिनाका लागि ल्याइएको छुट योजना आवश्यकताअनुसार थप गर्न सकिने उनको भनाइ छ ।
‘फ्लाई दुबईको पोखरा–दुबई उडानलाई नियमित र दिगो बनाउनु होटल व्यवसायीको पनि दायित्व सम्झेर छुट योजना ल्याइएको हो,’ उनले भने ।
यसैगरी, रेष्टुराँ एण्ड बार एसोसिएसन (रेवान) पोखराले पनि फ्लाई दुबईबाट पोखरा आउने यात्रुलाई संस्थामा आबद्ध रेष्टुराँमा १५ देखि २० प्रतिशतसम्म छुट दिने जनाएको छ ।
रेवान पोखराका अध्यक्ष वसन्त गौतमले फ्लाई दुबईको बोर्डिङ पास लिएर आउने यात्रु तथा पर्यटकले छुट सुविधा पाउने बताए । तीन महिनासम्म लागू हुने उक्त योजनालाई परिस्थितिअनुसार थप गर्न सकिने उनले जानकारी दिए ।
‘पोखराबाट हुन लागेको फ्लाई दुबईको उडानलाई दिगो र सफल बनाउन सबैको हातेमालो चाहिन्छ,’ गौतमले भने ।
पोखरा पर्यटन परिषद्का पूर्वअध्यक्ष पोमनारायण श्रेष्ठका अनुसार पोखराका अन्य पर्यटन व्यवसायीले पनि उडानलाई लक्षित गरी छुट योजना ल्याउने तयारी गरिरहेका छन् । पर्यटन व्यवसायीले एकीकृत छुट प्याकेज तयार गरी एप्समार्फत सार्वजनिक गर्ने तयारीसमेत गरेका छन् ।
‘पोखरा–दुबई हवाई उडानलाई दिगो र प्रभावकारी बनाउन पोखरेली पर्यटन व्यवसायी एकजुट छौँ,’ उनले भने ।
पोखरा पर्यटन परिषद्, नेपाल एसोसिएसन अफ टुर एण्ड ट्राभल एजेन्ट्स (नाट्टा) गण्डकीलगायत पर्यटनसम्बद्ध सङ्घसंस्थाले पनि उडानलाई सफल बनाउन सक्रियता बढाएका छन् ।
सरकारले चालु आर्थिक वर्षको नीति तथा कार्यक्रममा पोखरा अन्तरराष्ट्रिय विमानस्थलमा अन्तरराष्ट्रिय वायुसेवा प्रदायकलाई आकर्षित गर्न कूटनीतिक पहल गर्ने जनाएको थियो । त्यसको केही समयपछि फ्लाई दुबईले पोखरामा उडान सुरु गर्न लागेको हो ।
दुबई–पोखरा–दुबई उडानका लागि नेपाल नागरिक उड्डयन प्राधिकरणले गत जेठ २५ गते फ्लाई दुबईलाई अनुमति दिएको थियो ।
उडान तालिकाअनुसार दुबईबाट आउने जहाज बुधबार साँझ ६ः१५ बजे पोखरा अन्तरराष्ट्रिय विमानस्थलमा अवतरण गर्नेछ । पोखराबाट यात्रु लिएर सोही दिन साँझ ७ः१५ बजे जहाज दुबईका लागि उड्ने विमानस्थलका सूचना अधिकारी विनोदसिंह रावतले जानकारी दिए ।
