काठमाडौँ । १४० मेगावाट क्षमताको तनहुँ जलविद्युत् आयोजनाअन्तर्गत निर्माणाधीन दमौली–भरतपुर २२० केभी प्रसारण लाइनका लागि तनहुँतर्फका सबै सामुदायिक वनमा रुख कटानको कानुनी स्वीकृति प्राप्त भएको छ।
आयोजना प्रमुख श्यामजी भण्डारीका अनुसार प्रसारण लाइन क्षेत्रमा पर्ने रुखको छपान तथा टाँचा लगाउने काम सम्पन्न भएपछि डिभिजन वन कार्यालयले थप १२ सामुदायिक वनमा रुख कटानको अनुमति दिएको हो। यससँगै तनहुँतर्फ प्रसारण लाइन क्षेत्रमा पर्ने सबै १७ सामुदायिक वनमा रुख कटानका लागि आवश्यक स्वीकृति प्राप्त भएको छ।
प्रसारण लाइन क्षेत्रअन्तर्गत देवघाट गाउँपालिकामा पाँच तथा बन्दीपुर गाउँपालिका र व्यास नगरपालिकामा छ–छ वटा सामुदायिक वन रहेका छन्। चितवनतर्फ भने रुख कटानको काम जारी रहेको आयोजना प्रमुख भण्डारीले जानकारी दिनुभयो।
दमौली–भरतपुर २२० केभी प्रसारण लाइन निर्माणको प्याकेज–३ अन्तर्गत करिब ३५ किलोमिटर क्षेत्रमा ९४ वटा टावर निर्माण गर्नुपर्नेछ। निर्माण व्यवसायी भारतको केइसी इन्टरनेशनल लिमिटेडले हालसम्म ८३ वटा टावरको जग निर्माण र ७८ वटा टावर जडानको काम सम्पन्न गरिसकेको छ।
भण्डारीका अनुसार प्याकेज–३ को समग्र निर्माण प्रगति ८२ प्रतिशत पुगेको छ। तनहुँतर्फका सबै सामुदायिक वनमा रुख कटानको स्वीकृति प्राप्त भएसँगै प्रसारण लाइन निर्माणको बाँकी कामलाई तीव्रता दिन सहज हुने आयोजनाको अपेक्षा छ।
आयोजनाको निर्माण कार्य तीनवटा प्याकेजमा विभाजन गरी अघि बढाइएको छ। प्याकेज–१ अन्तर्गत बाँधलगायतका संरचना निर्माणको जिम्मा सोङ्दा कालिका जेभीले पाएको छ। यस प्याकेजको निर्माण प्रगति ६३ प्रतिशत रहेको छ।
त्यसैगरी, प्याकेज–२ अन्तर्गत विद्युत्गृह तथा सम्बन्धित उपकरण निर्माणको काम चीनको सिनो हाइड्रो कर्पोरेसनले गरिरहेको छ। यस प्याकेजको प्रगति ७९ प्रतिशत पुगेको छ।
आयोजनाको समग्र निर्माण प्रगति भने ७८ प्रतिशत रहेको जनाइएको छ।
रासस
