खोटाङ । दसैँ, तिहार तथा छठपर्वलाई लक्षित गर्दै खोटाङको प्रमुख व्यापारिक केन्द्र दिक्तेलबजारलगायतका स्थानमा बजार अनुगमन गरिएको छ ।
संयुक्त अनुगमन टोलीले दिक्तेलबजारका विभिन्न क्षेत्रमा रहेका ६६ वटा होलसेल तथा किराना पसलको अनुगमन गरेको हो । टोलीले अल्छेढुङ्गा–रत्नपार्क, रत्नपार्क–पुरानो बेसक्याम्प, पुरानो बेसक्याम्प–त्रिवेणीचोक, त्रिवेणीचोक–हाटडाँडा र हाटडाँडा–अस्पतालचोक क्षेत्रका पसलमा अनुगमन गरेको थियो ।
अनुगमनका क्रममा बरामद गरिएका म्याद गुज्रिएका खाद्यवस्तु तथा पेय पदार्थ सर्जमिन मुचुल्का तयार गरी नष्ट गरिएको छ । म्याद नाघेका पेय पदार्थ खाल्डोमा हालेर तथा दैनिक उपभोग्य सामग्री जिल्ला प्रशासन कार्यालय खोटाङको परिसरमा जम्मा गरी आगो लगाएर नष्ट गरिएको हो ।
घरेलु तथा साना उद्योग कार्यालयका प्रमुख भेषराज खत्रीले पटकपटक अनुगमन गरी म्याद गुज्रिएका सामग्री बिक्री नगर्न आग्रह गर्दा पनि व्यवसायीले अटेर गर्ने गरेको बताए ।
“बजारमै म्याद गुज्रेका खाद्यवस्तु र पेय पदार्थ भेटिँदा दूरदराजमा म्याद गुज्रेका सामग्री कति फेला पर्लान् भन्ने प्रश्न खडा भएको छ । प्रशासनले गर्ने अनुगमन गाउँगाउँमा पनि पुग्नुपर्ने नागरिकको माग छ”, उनले भने ।
उनले सम्भव भएसम्म जिल्लाका सबै स्थानमा अनुगमन गर्ने योजना रहेको बताउँदै प्रशासनको टोली पुग्न नसक्ने ठाउँमा सम्बन्धित स्थानीय तहलाई अनुगमन गर्न आग्रह गरिने जानकारी दिए ।
व्यापारीको लापरवाहीबारे सञ्चारकर्मीले गत भदौ २५ गते सरुवा भएर जिल्ला प्रशासन कार्यालय खोटाङ आएका प्रमुख जिल्ला अधिकारी महेशकुमार गुरुङसमक्ष उपभोक्ताका गुनासा राखेका थिए । सञ्चारकर्मीको गुनासोपछि प्रजिअ गुरुङको निर्देशनमा होलसेल तथा किराना पसलमा अनुगमन गरिएको हो ।
प्रजिअ गुरुङले खाद्यवस्तु तथा पेय पदार्थ खरिद गर्दा म्याद भए/नभएको अनिवार्य जाँच गर्न र म्याद गुज्रिएका सामग्री बिक्री गरेको भेटिएमा प्रशासनलाई जानकारी गराउन उपभोक्तालाई आग्रह गरे ।
“म्याद गुज्रेका सामग्री बिक्री गर्नेलाई पहिलोपटक सजग गराउँछौँ । पुनः भेटिएमा कानुनी कारबाहीको दायरामा ल्याइनेछ”, उनले भने, “उपभोक्ताको स्वास्थ्यमा कसैले पनि खेलबाड गर्न मिल्दैन । उपभोक्ता पनि सजग हुन आवश्यक छ ।”
खोटाङमा १० वटा स्थानीय तह छन् । ग्रामीण क्षेत्रमा उपभोक्ताले गाउँमा बिक्रीका लागि ल्याइएका दैनिक उपभोग्य सामग्री खरिद गर्दा मूल्य र म्यादबारे पर्याप्त ध्यान नदिने गरेको बताइएको छ ।
केपिलासगढी गाउँपालिका–१ फेदीका स्थानीय लक्ष्मण साम्पाङले गाउँमा ट्याक्टरमार्फत बिक्रीका लागि ल्याइएका चामललगायत दैनिक उपभोग्य वस्तु म्याद गुज्रिएको अवस्थामा फेला परेको भन्दै सम्बन्धित निकायलाई नियन्त्रणका लागि अनुरोध गर्दा पनि चासो नदिएको आरोप लगाए ।
