नारायणगढ (चितवन) । पृथ्वी राजमार्गअन्तर्गत कृष्णभीरमा पहिरो खसेर सडक पूर्णरूपमा अवरुद्ध भएपछि निर्माण थालिएको नयाँ ट्र्याकको काम अन्तिम चरणमा पुगेको छ ।
पहिरोका कारण सडक अवरुद्ध भएपछि तत्काल नयाँ ट्र्याक निर्माण सुरु गरिएको थियो । आइतबार भित्तातर्फको कटिङ तथा सडक सम्याउने काम सम्पन्न भएपछि परीक्षणका रूपमा केही सवारीसाधन सञ्चालन गराइएको थियो । परीक्षण सफल भएपछि ट्र्याकलाई नियमित यातायात सञ्चालनका लागि तयार पार्ने काम तीव्र पारिएको छ ।
नयाँ ट्र्याक निर्माणको जिम्मा पाएको निर्माण कम्पनीका इञ्जिनियर ईश्वर नेपालले निर्माण कार्य अन्तिम चरणमा पुगेको जानकारी दिए । उनका अनुसार सोमबार ११औँ दिनमा ग्राभेलिङ, स्लोप कटिङ र नाली निर्माणको काम भइरहेको छ ।
“सम्भवतः असोज १ गतेदेखि पूर्णरूपमा यातायात सञ्चालन गर्ने गरी काम अगाडि बढाइरहेका छौँ,” उनले भने ।
निर्माणको पहिलो चरणमा नौदेखि १० दिनसम्म ११–१२ वटा उपकरण परिचालन गरिएको थियो । अहिले काम अन्तिम चरणमा पुगेकाले करिब ४०–५० जना दक्ष तथा अदक्ष मजदुर परिचालन गरिएको छ । आवश्यकताअनुसार ग्रेडर, रोलर र एक्साभेटरसहित पाँच–छ वटा हेभी इक्युपमेन्ट प्रयोग भइरहेका छन् ।
हाल नयाँ ट्र्याकमा नदीबाट निकालिएको गेग्रान प्रयोग गरी ग्राभेलिङ गर्ने काम भइरहेको छ । सडकको किनारमा ड्रेन निर्माण गरी पाइप राख्ने र त्यसलाई बेरेर माथिबाट टिक ड्रेन बनाउने काम पनि भइरहेको इञ्जिनियर नेपालले बताए । सब–बेसको अन्तिम तह निर्माण सम्पन्न भएपछि सडक यातायात सञ्चालनका लागि तयार हुने उनको भनाइ छ ।
करिब ३०० मिटर लामो नयाँ ट्र्याकमा सात मिटर चौडाइको सडक निर्माण गरिएको छ भने नालीसहित यसको चौडाइ करिब साढे सात मिटर रहेको छ ।
“यो खण्ड केही जोखिमयुक्त छ । थप पहिरो नआएमा तोकिएको समयमै यातायात सञ्चालन गर्न सकिन्छ,” नेपालले भने ।
नागढुङ्गा–मुग्लिन सडक योजना (पश्चिम खण्ड) का सूचना अधिकारी इञ्जिनियर सचेन्द्र मिश्रले आइतबार नयाँ ट्र्याकको ग्रेडिङ सम्पन्न भएपछि फिनिसिङको काम भइरहेको बताए । उनका अनुसार आइतबार परीक्षणका लागि मात्रै केही सवारीसाधनलाई नयाँ ट्र्याकबाट पास गराइएको थियो ।
“सर्वसाधारण नयाँ ट्र्याक खुला गरिएको भ्रममा नपर्नुहोला । परीक्षणका लागि मात्र हिजो केही सवारीसाधन पास गराइएको हो,” उनले भने ।
उनका अनुसार थप समस्या नआए असोज १ गतेसम्म निर्माणका सबै काम सम्पन्न गरी नयाँ ट्र्याकबाट नियमित रूपमा सवारीसाधन सञ्चालन गर्ने योजना छ ।
