म्याग्दी । धवलागिरि गाउँपालिका–७ काउसीबोट र वडा नं ४ बाँसबोट जोड्ने ३०३ मिटर लामो झोलुङ्गे पुल निर्माण सम्पन्न भएको छ ।
सङ्घीय सरकारको सस्पेन्सन ब्रिज डिभिजन, काठमाडौँले म्याग्दी नदीमाथि उक्त पुल निर्माण गरेको हो । पुल सञ्चालनमा आएसँगै हिलापोखरी, बाँसबोट, खोरबाङ, सोलवाङ, खारा, खाम्ला, छहरी, खिवाङ, शिवाङ, ताकम र काफलडाँडाका बासिन्दालाई आवतजावतमा सहज भएको गाउँपालिका अध्यक्ष प्रेमप्रसाद पुनले जानकारी दिनुभयो ।
उहाँका अनुसार पुल बनेपछि बाँसबोटका किसानले उत्पादन गर्ने केरालगायत कृषि उपजको बजारीकरणमा समेत सहज भएको छ ।
पुल निर्माणका लागि २०८२ असारमा रामकृष्ण–सोमरस जेभी र सस्पेन्सन ब्रिज डिभिजनबीच रु एक करोड ६४ लाख १५ हजार २५४ मा ठेक्का सम्झौता भएको थियो । १८ महिनाको ठेक्का अवधि रहे पनि निर्माण कम्पनीले निर्धारित समयअगावै काम सम्पन्न गरेको जनाएको छ । निर्माण कम्पनीका प्रतिनिधि प्रविन सापकोटाले पुल निर्माण सम्पन्न भएसँगै यसै महिनादेखि आवतजावतका लागि खुला गरिएको जानकारी दिनुभयो ।
धवलागिरि गाउँपालिका–७ का राजकुमार कोइरालाका अनुसार पुल निर्माणपछि स्थानीयको यात्राअवधि समेत उल्लेख्य रूपमा घटेको छ । यसअघि एक घण्टा लाग्ने बाटो पुल बनेपछि करिब पाँच मिनेटमा छोटिएको उहाँले बताउनुभयो । पुलले यस क्षेत्रलाई पर्यटकीय गन्तव्यका रूपमा विकास गर्नसमेत सहयोग पुग्ने अपेक्षा गरिएको छ ।
धवलागिरि गाउँपालिकामा यसअघि गत वर्ष दुई वटा ३०० मिटरभन्दा लामा झोलुङ्गे पुल निर्माण भएका थिए । वडा नं ६ घाइरीबोट र खाउरीबाङ जोड्ने मराङखोलामा ३६५ मिटर तथा वडा नं ३ फलियागाउँ र दर जोड्ने दरखोलामा ३६६ मिटर लामो पुल निर्माण भएका हुन् ।
योसहित म्याग्दीमा ३०० मिटरभन्दा लामा झोलुङ्गे पुलको संख्या सात पुगेको छ । रघुगंगा गाउँपालिका–१ बेग र बादुक जोड्ने बेगखोलामा ३६५.८० मिटर, मालिका गाउँपालिका–७ बिमवाङ र धवलागिरि गाउँपालिका–६ रिख जोड्ने ३५० मिटर, बेनी नगरपालिका–१ रत्नेचौर र बागलुङ नगरपालिका–४ कुडुले जोड्ने ३८८ मिटर तथा अन्नपूर्ण गाउँपालिका–५ शिख र किन्दु जोड्ने ३४४ मिटर लामो झोलुङ्गे पुल निर्माण भइसकेका छन् ।
