काठमाडौँ । प्रमुख पर्यटकीय क्षेत्र ठमेलमा एक युवतीमाथि दुर्व्यवहार गरेको आरोपमा प्रहरीले शालीन शाहलाई पक्राउ गरेको छ। जिल्ला प्रहरी परिसर काठमाडौँ र काठमाडौँ उपत्यका अपराध अनुसन्धान कार्यालयको संयुक्त टोलीले शाहलाई कलङ्कीबाट पक्राउ गरेको हो।
पीडित युवतीले ठमेलमा आफूमाथि दुर्व्यवहार भएको भन्दै घटना सार्वजनिक गरेपछि प्रहरीले घटनालाई गम्भीरतापूर्वक लिँदै अनुसन्धान अघि बढाएको थियो। घटनाबारे जानकारी पाएलगत्तै प्रहरीले आरोपितको पहिचान तथा खोजीका लागि अनुसन्धान तीव्र बनाएको जनाएको छ।
प्रहरीका अनुसार खोजतलासका क्रममा शाहलाई कलङ्कीमा लुकिछिपी बसेको अवस्थामा नियन्त्रणमा लिइएको हो। पक्राउ परेका शाहलाई थप अनुसन्धानका लागि जिल्ला प्रहरी परिसर काठमाडौँमा राखिएको छ।
घटनाको वास्तविक कारण, परिस्थितिसहित थप विवरणबारे अनुसन्धान भइरहेको प्रहरीले जनाएको छ।
