काठमाडौं। नेपाल आयल निगमका कार्यकारी निर्देशक नागेन्द्र साहले एलपी ग्यासको मूल्यलाई लिएर गुनासो बढे पनि अन्य उपभोग्य वस्तुको तुलनामा ग्यास महँगो नरहेको दाबी गरेका छन्। उनले मूल्यभन्दा उपभोक्तालाई सहज रूपमा ग्यास उपलब्ध गराउनु अहिलेको मुख्य प्राथमिकता भएको बताए।
नेपाल आर्थिक पत्रकार समाज (सेजन)ले आयोजना गरेको ‘बाढीपहिरोपछिको आपूर्ति तथा मूल्य शृंखलामा परेको प्रभाव र देखिएका चुनौती’ विषयक कार्यक्रममा साहले निगमले प्रतिसिलिन्डर करिब ४ सय रुपैयाँ घाटा व्यहोरेर ग्यास बिक्री गरिरहेको जानकारी दिए।
‘आज बजारमा एक किलो मासुलाई १७ देखि १८ सय रुपैयाँ पर्छ, जुन एक छाक वा एक दिनमै सकिन्छ,’ साहले भने, ‘तर करिब २१ सय रुपैयाँ पर्ने एक सिलिन्डर ग्यासले एउटा परिवारलाई दुई महिनासम्म पुग्छ।’
नेपालमा ग्यास उत्पादन नहुने र पूर्ण रूपमा आयातमा निर्भर रहनुपर्ने भएकाले मूल्यभन्दा आपूर्तिको निरन्तरतालाई प्राथमिकता दिनुपर्ने उनको भनाइ थियो। व्यवसायीले पनि घाटामा कारोबार गर्नुपरेको गुनासो गरिरहेको उल्लेख गर्दै साहले ग्यासको मूल्यबारे उपभोक्ताको गुनासोलाई व्यावहारिक रूपमा हेर्नुपर्ने बताए।
बाढीपहिरोका कारण आपूर्ति प्रणालीमा थप चुनौती आए पनि उपभोक्ताको हितलाई ध्यानमा राख्दै ग्यास आपूर्ति सहज बनाउन निगमले अधिकतम प्रयास गरिरहेको उनले बताए।
