काठमाडौँ । रेडक्रस तथा रेडक्रिसेन्ट सोसाइटीहरूको अन्तर्राष्ट्रिय महासङ्घ (आइएफआरसी)ले तिब्बतबाट आएको बाढीका कारण भोटेकोशी र त्रिशूली नदीमा आएको भीषण बाढीबाट प्रभावितको खोज, उद्धार तथा पुनःस्थापनाका लागि करिब १९ करोड रुपैयाँ सहयोग गर्ने भएको छ।
आइएफआरसीले तत्काल १२ लाख अमेरिकी डलर अर्थात् करिब रु १८ करोड ९६ लाख २२ हजार सहयोग उपलब्ध गराउने जनाएको हो।
महासङ्घका अनुसार रेडक्रसका स्वयंसेवकसहितको आपत्कालीन प्रतिकार्य टोली प्रभावित क्षेत्रमा परिचालन भइसकेको छ। टोलीले खोज तथा उद्धारसँगै प्रारम्भिक राहत वितरणको काम गरिरहेको छ।
आइएफआरसीका महासचिव जगन चापागाईंले भोटेकोशी बाढीबाट प्रभावित समुदायलाई तत्काल मानवीय सहायता उपलब्ध गराउन आर्थिक सहयोग प्रदान गरिएको जानकारी दिएका छन्।
सामाजिक सञ्जालमार्फत उनले आइएफआरसी नेपाल रेडक्रस र सम्बन्धित राष्ट्रिय निकायसँग समन्वय गरी आवश्यकताअनुसार समुदायमा थप सहयोग परिचालन गर्न तयार रहेको बताएका छन्।
उनका अनुसार रेडक्रसका स्वयंसेवकहरू प्रभावित समुदायमा सक्रिय रूपमा खटिएर प्रारम्भिक राहत तथा आवश्यक सहयोग उपलब्ध गराइरहेका छन्।
महासचिव चापागाईंले बाढीमा ठूलो मानवीय क्षति हुनुका साथै धेरै मानिस बेपत्ता भएको र भौतिक संरचनामा समेत क्षति पुगेको घटनाप्रति दुःख व्यक्त गर्दै पीडित परिवारप्रति समवेदना प्रकट गरेका छन्।
