चीन। चीनको पश्चिमी स्वायत्त क्षेत्र सिजाङ (तिब्बत) को केरुङ नाका नजिकै बुधवार गएको पहिरोमा परी केही व्यक्ति बेपत्ता भएको आशंका गरिएको छ। स्थानीय अधिकारीका अनुसार पहिरोबाट क्षेत्रमा ठूलो क्षति पुगेको छ।
सिगात्से सहरअन्तर्गत केरुङ (ग्याइरोङ) जिल्लाको आपत्कालीन व्यवस्थापन ब्युरोका अनुसार पहिरोले केरुङ नाकातर्फ जाने सडक पूर्ण रूपमा अवरुद्ध भएको छ। प्रभावित क्षेत्रमा सञ्चार सम्पर्क र विद्युत् आपूर्ति पनि ठप्प भएको जनाइएको छ।
बेपत्ता भएको आशंका गरिएका व्यक्तिहरूको खोजी भइरहेको छ। अवरुद्ध सडक खुलाउन तथा सञ्चार र विद्युत् सेवा पुनः सञ्चालन गर्न स्थानीय प्रशासनले पहल गरिरहेको छ।
नेपाल–चीनबीचको व्यापार तथा पारवहनका लागि केरुङ नाका प्रमुख स्थलमार्ग हो।
