काठमाडौं । उज्यालो नेपाल पार्टीले विद्युत्, सिँचाइ र सार्वजनिक सेवामा लगाइएको कर तथा महसुल वृद्धिको विरोधमा एकमहिने देशव्यापी अभियान घोषणा गरेको छ । पार्टी अध्यक्ष कुलमान घिसिङले सरकारले न्यून तथा मध्यम आय भएका नागरिकमाथि करको भार थपेको टिप्पणी गर्दै अभियान घोषणा गरेका हुन् ।
माइतीघरमा आयोजित हस्ताक्षर कार्यक्रममा घिसिङले घरायसी विद्युत्मा ५ प्रतिशत तथा उद्योग, खानेपानी र सिँचाइमा १३ प्रतिशत मूल्य अभिवृद्धि कर (भ्याट) लगाएर सरकारले उपभोक्ता र किसानमाथि थप भार पारेको बताए । राइड सेयरिङमा आबद्ध न्यून आय भएका युवामाथिसमेत ५ प्रतिशत भ्याट र व्यक्तिगत आयकर लगाइएको भन्दै उनले सरकारको कर नीतिमाथि प्रश्न उठाए ।
‘किसानले प्रयोग गर्ने सिँचाइको विद्युत् महसुल निःशुल्क गर्नुपर्नेमा उल्टै १३ प्रतिशत भ्याट थपिनु संवेदनशील विषय हो,’ उनले भने ।
घिसिङले विद्युत् खपत बढाएर ग्यासको परनिर्भरता घटाउने ठोस योजना ल्याउनुपर्ने बताए । ईभीमा भन्सार दर बढाउनु आत्मनिर्भर अर्थतन्त्रको दिशामा अवरोध भएको उनको भनाइ थियो । ग्यासको अभावका बेला इन्डक्सन चुल्हो र विद्युतीय सवारीसाधनको प्रयोग बढाउनुपर्ने उनले बताए।
उनले डेडिकेटेड तथा ट्रंक लाइनको अर्बौं रुपैयाँ बक्यौता उठाउनुपर्ने मागसमेत दोहोर्याए । आफू नेपाल विद्युत् प्राधिकरणमा रहँदा बक्यौता उठाउन खोज्दा सरकारले हटाएको स्मरण गर्दै उनले अहिले विभिन्न समिति बनाएर रकम मिनाहा गर्ने प्रयास भइरहेको भन्दै खबरदारी गरे ।
विद्युत्मा लगाइएको भ्याट फिर्ता गर्न तथा ऊर्जा खपत बढाउने स्पष्ट कार्ययोजना ल्याउन माग गर्दै पार्टीले देशभर हस्ताक्षर, जनसम्पर्क तथा दबाबमूलक कार्यक्रम सञ्चालन गर्ने जनाएको छ ।
