काठमाडौं । देशका विभिन्न क्षेत्रमा बाढीपहिरोको जोखिम बढेको भन्दै सांसदहरूले सरकारको ध्यानाकर्षण गराएका छन् । प्रतिनिधिसभाको सोमबारको आकस्मिक समयमा सांसदहरूले मनसुनजन्य विपद् न्यूनीकरण, प्रभावितको उद्धार तथा राहतका लागि तत्काल तयारी गर्न सरकारको ध्यानाकर्षण गराए ।
नेपाली कम्युनिष्ट पार्टीका सांसद वर्षमान पुनले २७ साउनमा रोल्पामा गएको पहिरोमा १३ जनाको मृत्यु भएको बताए । त्यसैगरी २८ साउनमा सुनसरीको ग्राम क्षेत्रमा चार जनाको मृत्यु भएको र ३० साउनमा पहिरोमा परी एक जनाको मृत्यु भएको पनि उनले बताए । घटनाबारे आफूले प्रधानमन्त्री बालेन्द्र साहलाई भेटेरै ध्यानाकर्षण गराएको पुनले बताए ।
उनले मृतकका परिवारलाई उचित राहत तथा क्षतिपूर्ति र घाइतेको उपचारमा गम्भीर हुन सरकारसँग आग्रह गरे ।
त्यस्तै, सांसद बलावती शर्माले बागलुङको निसीखोला गाउँपालिका–२ धाराटोलमा पहिरो खस्दा आठ घरमा क्षति पुगेको र ती घरहरू उच्च जोखिममा रहेको बताइन् । पहिरोले धनबहादुर खत्री, राजन परियार, हरिकला घर्ती, दीपक परियार, तारा घर्ती, ज्ञानबहादुर परियार, देविराम घर्ती र टिका घर्तीका घरमा क्षति पुगेको उनले बताइन् ।
शर्माले बाढीपहिरोको जोखिम न्यूनीकरणका लागि आवश्यक तयारी गर्न तथा प्रभावित परिवारका लागि सुरक्षित बासस्थानको व्यवस्था गर्न सरकारको ध्यानाकर्षण गराइन् ।
बैठकमा सांसदहरूले बजारमा खाना पकाउने ग्यासको अभाव देखिएको भन्दै आपूर्ति सहज बनाउनसमेत सरकारको ध्यानाकर्षण पनि गराएका थिए ।
