काठमाडौं। खाना पकाउने एलपी ग्यासको अभाव चर्किएपछि नेपाल आयल निगमले काठमाडौंका पाँच स्थानबाट शनिबारदेखि ग्यास वितरण थाले पनि उपभोक्ताले सहज रूपमा ग्यास पाउन सकेका छैनन्। बिहानैदेखि लामो लाइनमा बसेका उपभोक्तामध्ये कतिपयले दिनभर कुर्दासमेत ग्यास नपाएको गुनासो गरेका छन्।
निगमले जिल्ला प्रशासन कार्यालय काठमाडौंसँगको समन्वयमा टेकुस्थित निगम परिसर, चाबहिलस्थित यातायात कार्यालय परिसर, कीर्तिपुर र वसुन्धरास्थित राधास्वामी परिसर तथा बबरमहलस्थित पुरानो जिल्ला प्रशासन कार्यालय परिसरबाट ग्यास वितरण थालेको हो। केन्द्रअनुसार फरक–फरक ब्रान्डका ग्यास उपलब्ध गराइएको निगमले जनाएको छ।
ग्यास लिन बिहानैदेखि वितरण केन्द्रहरूमा ठूलो भीड लागेको थियो। निगमका कर्मचारी भीमप्रसाद पौडेलका अनुसार बबरमहल केन्द्रमा मात्रै ग्यास लिन एक हजारभन्दा बढी उपभोक्ता पुगेका थिए। यहाँबाट काठमाडौंका जुनसुकै क्षेत्रका उपभोक्ताले ग्यास लिन सक्ने व्यवस्था गरिएको छ।
निगमले बिहान १० बजेदेखि साँझ ६ बजेसम्म ग्यास वितरण गर्ने जनाएको छ। बबरमहल केन्द्रमा करिब १० प्रकारका ग्यास सिलिन्डर उपलब्ध रहेको पौडेलले बताए। ग्यास संकटका कारण डिपोसँगको समन्वयमा वितरण व्यवस्था मिलाइएको उनको भनाइ छ।
तर बबरमहलमा लाइन बसेका उपभोक्ताले भने पालो आएपछि पनि ग्यास नपाएको गुनासो गरेका छन्। लामो समय लाइनमा बसेर पालो कुर्दा वितरण केन्द्रमै ग्यास सकिएपछि आफूहरू पर्खिन बाध्य भएको उनीहरूले बताएका छन्। ग्यास आउने आशामा दिनभर कुरेर बसेको उनीहरूको भनाइ छ।
‘दिनभर कुर्दा पनि ग्यास पाएनौँ,’ लाइनमा बसेका एक उपभोक्ताले गुनासो गरे।
यसैबीच निगमले ग्यासको कालोबजारी तथा अनावश्यक भण्डारणविरुद्ध अनुगमन तीव्र बनाएको जनाएको छ। ग्यास लुकाउने, अनावश्यक रूपमा भण्डारण गर्ने तथा कालोबजारी गर्नेहरूलाई कानुनी दायरामा ल्याउने गरी अनुगमन भइरहेको पौडेलले बताए।
निगमले अत्यावश्यक परेका उपभोक्तालाई मात्र तोकिएका वितरण केन्द्र र समयमा उपस्थित भएर ग्यास खरिद गर्न आग्रह गरेको छ। ग्यास लिन आउने उपभोक्ताले अनिवार्य रूपमा परिचयपत्र साथमा ल्याउनुपर्नेछ।
