जनकपुरधाम। सरकार र मिटरब्याज पीडित पक्षबीच भएको लेनदेनसम्बन्धी ९ बुँदे सहमति तथा त्यसअनुसारको मन्त्रिपरिषद् निर्णयप्रति असन्तुष्टि जनाउँदै साहु–महाजनहरूले शुक्रबार जनकपुरधाममा प्रदर्शन गरेका छन्।
पीडित लेनदेन संघर्ष समितिको अगुवाइमा भएको प्रदर्शनमा सहभागीहरूले सरकारसँग भएको सहमति र मन्त्रिपरिषद्को निर्णय आफ्ना हितविपरीत रहेको दाबी गर्दै तत्काल खारेज गर्न माग गरेका छन्।
मधेश प्रदेशका आठवटै जिल्लाबाट आएका साहु–महाजनहरूले जनकपुरधाम नगर परिक्रमा गर्दै जिल्ला प्रहरी कार्यालय, जिल्ला प्रशासन कार्यालय धनुषा र जिल्ला अदालत धनुषाअघि प्रदर्शन गरेका थिए। प्रदर्शनका क्रममा उनीहरूले ‘कानुनी राज्य बहाल गर’ भन्दै नाराबाजी गरेका थिए।
समितिका मधेश प्रदेश अध्यक्ष विजय यादवले सरकारले आफ्ना माग बेवास्ता गरे आन्दोलनका कार्यक्रम घोषणा गरिएको बताए। उनका अनुसार माग सम्बोधन नभए भदौ १ गतेदेखि काठमाडौंमा सिंहदरबार घेराउ गर्ने र माइतीघरमा धर्ना दिने कार्यक्रम तय गरिएको छ।
समितिले लेनदेनसम्बन्धी विवादको दीर्घकालीन समाधानका लागि सरकार, मिटरब्याज पीडित र साहु–महाजन पक्षबीच त्रिपक्षीय वार्ता आह्वान गर्न पनि माग गरेको छ।
