इन्डोनेसिया। इन्डोनेसियाको पूर्वी जाभा प्रान्तस्थित मदुरा टापुको उत्तरी जाभा सागरमा आइतबार यात्रुवाहक जहाजमा आगलागी हुँदा पाँच जनाको मृत्यु भएको छ भने ४१ जना अझै बेपत्ता छन्।
राष्ट्रिय खोज तथा उद्धार निकायका अनुसार मुतियरा सन्तोसा–२ नामक जहाजमा २ सय ७१ जना सवार थिए। तीमध्ये २ सय ३२ जना यात्रु र ३९ जना चालक दलका सदस्य थिए।
सुराबायाबाट माकासारतर्फ जाँदै गरेको जहाज तटबाट करिब १९ नटिकल माइल (३५.२ किलोमिटर) टाढा पुगेका बेला भीषण आगलागी भएको थियो। आगो तीव्र रूपमा फैलिएपछि यात्रुहरू उद्धारको पर्खाइमा जहाजको ब्रिज र अगाडिको भागमा जम्मा भएका थिए।
दुर्घटनापछि परिचालित संयुक्त खोज तथा उद्धार टोलीले हालसम्म २ सय २५ जनाको सकुशल उद्धार गरेको छ। उद्धार अभियानमा आसपास रहेका जहाजसँगै सरकारी निकायका थप टोली परिचालन गरिएका छन्।
अधिकारीहरूले बेपत्ता ४१ जनाको खोजी जारी रहेको बताएका छन्। आगलागीको कारण खुल्न नसकेको र घटनाबारे अनुसन्धान भइरहेको जनाइएको छ।
