नयाँदिल्ली- विरोध प्रदर्शनका क्रममा पक्राउ गरिएका भारतीय विपक्षी दलका नेता राहुल गान्धीलाई रिहा गरिएको जनाइएको छ।
काक्रोच जनता पार्टी (सिजेपी) को नेतृत्वमा सामाजिक सञ्जालमार्फत सुरु भएको विरोध प्रदर्शन सन् २०२४ मा प्रधानमन्त्री नरेन्द्र मोदी नेतृत्वको सरकार पुनः निर्वाचित भएपछि देखिएको सबैभन्दा ठूलो चुनौतीका रूपमा उभिएको बताइएको छ। प्रदर्शनकारीहरूले शिक्षा मन्त्री धर्मेन्द्र प्रधानको राजीनामा तथा परीक्षा प्रणालीमा व्यापक सुधारको माग गर्दै नाराबाजीसहित प्रदर्शन गर्दै आएका छन्।
भारत सरकारले विद्यार्थीहरूको मागलाई बेवास्ता गरेको र नयाँ दिल्लीमा भइरहेको प्रदर्शनमा प्रहरी दमन गरेको आरोप लगाउँदै राहुल गान्धीले मंगलबार प्रदर्शनको नेतृत्व गरेका थिए।
परीक्षा विवादको व्यवस्थापनलाई लिएर सरकारमाथि दबाब बढिरहेका बेला शिक्षा मन्त्री धर्मेन्द्र प्रधानले मंगलबार सरकारले सुधारका लागि प्रतिबद्ध रहेको बताएका छन्। उनले सामाजिक सञ्जालमार्फत विद्यार्थीहरूलाई सम्बोधन गर्दै सुधार र जवाफदेहिताका लागि सरकार पूर्ण रूपमा प्रतिबद्ध रहेको उल्लेख गरेका छन्।
राजधानी नयाँ दिल्लीमा लामो समयपछि भएको ठूलो प्रदर्शनका क्रममा प्रदर्शनकारीहरूले सुरक्षाकर्मीमाथि ढुङ्गा प्रहार गरेपछि प्रहरीले अश्रुग्यास र लाठीचार्ज प्रयोग गरेको जनाएको छ। प्रहरीका अनुसार प्रदर्शनका क्रममा ६० जना सर्वसाधारण र ११८ जना प्रहरी कर्मचारी घाइते भएका छन्।
प्रदर्शनलाई समर्थन गर्दै मुम्बई र बेङ्गलुरुमा पनि सयौँ मानिसहरूले विरोध प्रदर्शन गरेको जनाइएको छ। सामाजिक सञ्जालमार्फत शिक्षा मन्त्री प्रधानलाई अयोग्य भन्दै आलोचना गरेको सिजेपीले बुधबार पनि आफ्नो अभियान जारी राख्ने घोषणा गरेको छ।
सन् २०२४ मा तेस्रो कार्यकालका लागि निर्वाचित भएका मोदी नेतृत्वको सरकारका लागि यो आन्दोलन ठूलो चुनौतीका रूपमा देखिएको बताइएको छ। गत मे महिनामा सुरु भएको सिजेपी अभियानले सामाजिक सञ्जालमा लाखौँ समर्थक आकर्षित गरेको जनाइएको छ।
परीक्षा प्रणालीमाथि उठेका प्रश्न र विवादहरूको श्रृङ्खलाले सरकारप्रतिको विश्वास कमजोर बनाएको प्रदर्शनकारीहरूको दाबी छ। मेडिकल प्रवेश परीक्षाको प्रश्नपत्र चुहावट प्रकरणपछि करिब २० लाखभन्दा बढी उम्मेदवार प्रभावित भएका थिए भने कतिपयलाई पुनः परीक्षा दिन बाध्य पारिएको जनाइएको छ।
करिब २० लाख विद्यार्थी सहभागी हुने मेडिकल प्रवेश परीक्षासँग सम्बन्धित अनलाइन नतिजा र अंक प्रणालीको विवाद चर्किएपछि जनआक्रोश थप बढेको र विरोध प्रदर्शनले व्यापक रूप लिएको बताइएको छ।
