काठमाडौं । प्रधानमन्त्री बालेन्द्र साहले पुँजीबजार सुधारका लागि लगानीकर्ताले उठाएका जायज माग कार्यान्वयन गर्न सरकार प्रतिबद्ध रहेको बताएका छन् ।
सोमवार पुँजीबजारका नियामक निकाय, ब्रोकर तथा लगानीकर्ताका प्रतिनिधिसँग भएको छलफलमा प्रधानमन्त्री साहले सम्बन्धित निकायसँग थप छलफल गरेर आवश्यक सुधार अघि बढाइने बताएका हुन् ।
प्रधानमन्त्रीसँगको भेटपछि स्टक ब्रोकर एशोसिएशन अफ नेपालका पूर्वअध्यक्ष तथा नेपाल उद्योग वाणिज्य महासंघअन्तर्गतको पुँजीबजार फोरमका सभापति प्रियराज रेग्मीले बजार सुधारसँग सम्बन्धित विभिन्न विषयमा प्रधानमन्त्रीको ध्यानाकर्षण गराइएको जानकारी दिए । उनका अनुसार संस्थागत लगानीकर्ताको भूमिका विस्तार, कर प्रणालीमा सुधार, ब्रोकरमार्फत मार्जिन लेन्डिङ सञ्चालनका लागि आवश्यक नियामकीय व्यवस्था, गैरआवासीय नेपाली (एनआरएन)लाई छिटो पुँजीबजारमा प्रवेश गराउने व्यवस्था, स्टक एक्सचेन्जको पुनर्संरचना, आईपीओ प्रणालीमा सुधार, १० कित्ते नीतिको पुनरावलोकन तथा इन्ट्राडे कारोबार सञ्चालनलगायतका विषयमा छलफल भएको थियो ।
लगानीकर्ताको घाटा समायोजन गरेपछि मात्रै शेयर कारोबारमा कर लगाउने व्यवस्था लागू गर्नुपर्ने माग पनि प्रधानमन्त्रीसमक्ष राखिएको रेग्मीले बताए ।
रेग्मीले भने, ‘प्रधानमन्त्रीले हाम्रो सुझावलाई ध्यानपूर्वक सुन्नुभयो । नियामक निकाय र बजारका सरोकारवालासँग थप छलफल गरेर जायज माग कार्यान्वयनमा लैजाने प्रतिबद्धता जनाउनुभएको छ ।’
नियामक निकायका प्रमुखहरूले पनि पुँजीबजारमा सुधार आवश्यक रहेकोमा सहमति जनाएको भन्दै आफ्ना माग सम्बोधन हुनेमा आशावादी रहेको रेग्मीले बताए । प्रधानमन्त्री साहले लगानीकर्तालाई अनावश्यक त्रासमा नपरी ढुक्क भएर लगानीका गतिविधि अघि बढाउन आग्रह गर्दै पुँजीबजारले रोजगारी सिर्जना र राजस्व वृद्धिमा थप योगदान दिनुपर्नेमा जोड दिएको पनि उनले जानकारी दिए । प्रधानमन्त्रीको सक्रियताप्रति आफूहरू उत्साहित रहेको र पुँजीबजारमा देखिएका समस्या समाधान हुनेमा विश्वस्त रहेको लगानीकर्ताहरूको भनाइ छ ।
