गण्डकी। जिल्ला प्रहरी कार्यालय कास्कीले गत असार महिनामा विभिन्न मुद्दामा अदालतबाट दोषी ठहर भई सजाय भुक्तान नगरी फरार रहेका ६६ जना प्रतिवादीलाई पक्राउ गरेको छ। पक्राउ पर्नेमा ४८ पुरुष र १८ महिला रहेका छन्।
कार्यालयका सूचना अधिकारी प्रहरी नायब उपरीक्षक वीरेन्द्रकुमार पासवानका अनुसार पक्राउ परेका प्रतिवादीलाई कैद सजाय कार्यान्वयन तथा जरिवाना असुलउपरका लागि सम्बन्धित अदालतमा पेस गरिएको छ। उनीहरूबाट हालसम्म ११ वर्ष ११ महिना दुई दिन बराबरको कैद सजाय कार्यान्वयन गरिएको तथा दुई करोड ३९ लाख ७२ हजार ९९५ रुपैयाँ बिगो रकम असुलउपर भएको उनले जानकारी दिए।
प्रहरीका अनुसार पक्राउ परेका प्रतिवादीहरू चेक अनादर, सार्वजनिक शान्तिविरुद्धका कसुर, अंश तथा मानाचामाल, बिगो लेनदेन, बैंकिङ कसुर, सवारी ज्यान, अभद्र व्यवहारलगायत विभिन्न मुद्दामा अदालतबाट दोषी ठहर भएका थिए।
यस अवधिमा कास्कीमा विभिन्न प्रकृतिका २४५ वटा मुद्दा दर्ता भएका छन्। तीमध्ये २८ वटा जघन्य तथा गम्भीर अपराध, ११ वटा महिला, बालबालिका तथा ज्येष्ठ नागरिकसँग सम्बन्धित, ८५ वटा आर्थिक अपराध र १२१ वटा अन्य प्रकृतिका मुद्दा रहेका प्रहरीको तथ्यांकमा उल्लेख छ।
प्रहरीले पछिल्लो समय अदालतबाट दोषी ठहर भई फरार रहेका प्रतिवादीलाई खोजी गरी कानुनी कारबाहीको दायरामा ल्याउने अभियानलाई थप तीव्र बनाएको जनाएको छ।
