काठमाडौँ । अविरल वर्षापछि आएको बाढी र पहिरोका कारण देशभरका विभिन्न प्रमुख राजमार्गहरूमा यातायात सेवा प्रभावित भएको छ। नेपाल प्रहरीको पछिल्लो विवरणअनुसार कोशी, बागमती, गण्डकी र लुम्बिनी प्रदेशका विभिन्न सडक खण्ड पूर्ण तथा आंशिक रूपमा अवरुद्ध भएका छन्।
सबैभन्दा बढी असर बागमती प्रदेशमा परेको छ। काभ्रेपलाञ्चोकको रोशी गाउँपालिका–७ र ८ अन्तर्गत घुमाउने र गिम्दी क्षेत्रमा पहिरो खसेपछि बीपी राजमार्ग पूर्ण रूपमा बन्द भएको छ। त्यस्तै, खुर्कोट–नेपालथोक सडक खण्डमा बाढीको जोखिम बढेपछि सवारी आवागमन अस्थायी रूपमा रोकिएको छ।
सिन्धुपाल्चोकको भोटेकोशी गाउँपालिकाअन्तर्गत अरनिको राजमार्गको जिरो किलो र कोदारी क्षेत्रमा पहिरो खसेपछि सडक पूर्ण रूपमा अवरुद्ध भएको छ। ललितपुर–मकवानपुर जोड्ने कान्ति लोकपथ पनि पहिरो र बाढीको जोखिमका कारण बन्द रहेको छ। यद्यपि, धादिङको जवादखोला क्षेत्रमा रहेको पृथ्वी राजमार्ग भने पूर्ण रूपमा सञ्चालनमा आएको प्रहरीले जनाएको छ।
कोशी प्रदेशको इलामस्थित मेची राजमार्ग पहिरोका कारण पूर्ण रूपमा बन्द छ भने भोजपुरको मध्यपहाडी लोकमार्ग एकतर्फी रूपमा मात्रै सञ्चालन भइरहेको छ।
गण्डकी प्रदेशमा बागलुङको बेलबगर क्षेत्रमा पहिरो खसेपछि कालीगण्डकी करिडोर पूर्ण रूपमा अवरुद्ध भएको छ। नवलपरासी (पूर्व)को दाउन्ने क्षेत्रमा पूर्व–पश्चिम राजमार्गमा पहिरो खसेका कारण सडक एकतर्फी मात्र सञ्चालनमा रहेको छ, जसका कारण सवारी साधनको चाप बढेको छ।
लुम्बिनी प्रदेशमा पनि पहिरोका कारण सडक सञ्जाल प्रभावित भएको छ। अर्घाखाँचीको सालझण्डी–ढोरपाटन सडक खण्ड र गुल्मीको वामी–रिडी सडक खण्ड पूर्ण रूपमा अवरुद्ध रहेका छन्।
यसैबीच, रसुवाको पासाङ ल्हामु सडक र दोलखाको सखिने क्षेत्रको सडक भने एकतर्फी रूपमा सञ्चालनमा ल्याइएको नेपाल प्रहरीले जनाएको छ।
