काठमाडौँ । मनसुनी वर्षाका कारण हुन सक्ने बाढी, पहिरो तथा अन्य विपद्जन्य जोखिमलाई ध्यानमा राख्दै जिल्ला प्रशासन कार्यालय काठमाडौँले सडकमार्गबाट काठमाडौँ उपत्यकामा आवतजावत गर्ने सबै सवारीसाधन र यात्रुलाई विशेष सतर्कता अपनाउन आग्रह गरेको छ।
जल तथा मौसम विज्ञान विभागले सम्भावित भारी वर्षालाई लक्षित गर्दै जारी गरेको ‘रेड अलर्ट’ सूचनापछि प्रशासनले यस्तो आग्रह गरेको हो।
प्रशासनका अनुसार काठमाडौँ उपत्यकाको उत्तर, दक्षिण, पूर्व र पश्चिमतर्फ रहेका सबै प्रवेश तथा बाहिरिने नाकाबाट सञ्चालन हुने सार्वजनिक तथा निजी सवारीसाधनका सवारीधनी, चालक, सहचालक तथा यात्रुले यात्रा गर्दा उच्च सतर्कता अपनाउनुपर्नेछ।
विगतका वर्षहरूमा रातिको समयमा आएको बाढी र पहिरोका कारण ठूलो जनधनको क्षति भएको अनुभवलाई मध्यनजर गर्दै सम्भावित भारी वर्षा हुने दिनमा विशेष गरी रातिको यात्रा सकेसम्म टार्न वा अत्यधिक सावधानी अपनाउन प्रशासनले आग्रह गरेको छ।
त्यसैगरी, यात्रा सुरु गर्नुअघि सम्बन्धित प्रहरी प्रशासनबाट सडकको अवस्था तथा अवरोधबारे यकिन जानकारी लिन, सडक अवरुद्ध भए यात्रुका लागि खाना र पिउने पानीको व्यवस्था गर्न तथा बाढी वा पहिरोको जोखिम नभएको सुरक्षित स्थानमा मात्र सवारीसाधन रोक्न अनुरोध गरिएको छ।
कुनै आपत्कालीन अवस्था उत्पन्न भएमा नेपाल प्रहरी (१००), ट्राफिक प्रहरी (१०३) तथा सशस्त्र प्रहरी बल नेपाल (१११४ र १२३४) का टोल–फ्री नम्बरमा सम्पर्क गर्न जिल्ला प्रशासन कार्यालयले सबैसँग अनुरोध गरेको छ।
