काठमाडौं । राहदानी विभाग अगाडि आत्मदाहको प्रयास गरेका मुगुका गणेश नेपालीको उपचारका क्रममा निधन भएपछि काठमाडौं महानगरपालिकाले परिवारलाई मानवीय सहयोग, रोजगारी र सन्ततिलाई निःशुल्क शिक्षा उपलब्ध गराउने घोषणा गरेको छ।
महानगरका प्रवक्ता नवीन मानन्धरले शुक्रबार जारी गरेको विज्ञप्तिमा दिवंगत नेपालीका परिवारलाई मानवीय सहयोग उपलब्ध गराउने, रोजगारीको व्यवस्था गर्ने तथा सन्ततिलाई निःशुल्क शिक्षा दिने विषयमा विधिसम्मत रूपमा कार्यपालिका बैठकबाट निर्णय गरिने उल्लेख गरिएको छ।
महानगरले घटनाप्रति गहिरो दुःख व्यक्त गर्दै शोकसन्तप्त परिवारप्रति हार्दिक समवेदना प्रकट गरेको छ।
विज्ञप्तिमा गृह मन्त्रालयले गठन गर्ने छानबिन समितिलाई काठमाडौं महानगरपालिकाले पूर्ण सहयोग गर्ने प्रतिबद्धता पनि जनाइएको छ। छानबिनबाट प्राप्त सुझावका आधारमा आवश्यक सुधारात्मक तथा जिम्मेवारीपूर्ण कदम चालिने र नेपाल सरकारसँग समन्वय गरेर यस्ता घटना दोहोरिन नदिन आवश्यक उपाय अवलम्बन गरिने महानगरले जनाएको छ।
महानगरले संवेदनशील अवस्थालाई ध्यानमा राख्दै सबैलाई संयमित र धैर्यवान रहन समेत अपील गरेको छ।
