अमेरिका । अमेरिकाको मेरिल्याण्ड राज्यको डिष्ट्रिक्ट ७ए बाट हाउस अफ डेलिगेट्स सदस्यका लागि डेमोक्रेटिक पार्टीको प्राइमरी निर्वाचनमा नेपाली मूलका युवा नेता सतीश चापागाईं विजयी भएका छन्।
जुन २३ मा सम्पन्न डेमोक्रेटिक प्राइमरी निर्वाचनको ९९ प्रतिशत मतगणना हुँदा चापागाईंले दुई प्रतिस्पर्धीलाई पछि पार्दै दोस्रो स्थान हासिल गरेका हुन्। उक्त निर्वाचनमा खसेको कुल १० हजार ४०२ मतमध्ये उनले २ हजार ७१८ मत प्राप्त गरेका छन्। डिष्ट्रिक्ट ७एमा दुई जना उम्मेदवार निर्वाचित हुने व्यवस्था रहेकाले दोस्रो स्थानमा रहेसँगै उनी पार्टीको आधिकारिक उम्मेदवार बन्न सफल भएका हुन्।
यससँगै अब चापागाईंले आगामी नोभेम्बरमा हुने आम निर्वाचनमा रिपब्लिकन पार्टीका उम्मेदवारसँग प्रतिस्पर्धा गर्नेछन्। उनले ‘अफोर्डेबल मेरिल्याण्ड’, ‘सेफ कम्युनिटिज’ र ‘स्ट्रङ बिजनेसेज’लाई आफ्नो चुनावी अभियानका प्रमुख नाराका रूपमा अघि सारेका छन्। यी नारामार्फत उनले बढ्दो महँगी नियन्त्रण, सुरक्षित समुदाय निर्माण तथा व्यवसाय प्रवर्द्धनलाई प्राथमिकतामा राखेका छन्।
सतीश चापागाईं हाल मेरिल्याण्ड राज्य डेमोक्रेटिक पार्टीका निर्वाचित केन्द्रीय सदस्यसमेत हुन्। यसले राज्यको राजनीतिक क्षेत्रमा उनको सक्रियता र अनुभवलाई थप सुदृढ बनाएको छ।
राजनीतिसँगै उनी सामाजिक, शैक्षिक तथा व्यावसायिक क्षेत्रमा पनि सक्रिय छन्। उनी सफल साना व्यवसायी हुनुका साथै बाल्टिमोर काउन्टी पब्लिक स्कुल्समा दोभाषेका रूपमा कार्यरत छन्। यसबाहेक विभिन्न सामाजिक तथा सामुदायिक संस्थामा नेतृत्वदायी भूमिका निर्वाह गर्दै आएका छन्।
चापागाईंले श्रमिक परिवार, आर्थिक रूपमा कमजोर वर्ग तथा समुदायका आवाजलाई प्राथमिकतामा राख्दै सार्वजनिक सहभागिता, समान अवसर र सामाजिक न्यायका पक्षमा निरन्तर वकालत गर्दै आएको बताएका छन्। समुदायसँग प्रत्यक्ष संवाद गर्दै व्यवहारिक समाधान खोज्ने नेतृत्वका रूपमा आफूलाई स्थापित गर्ने उनको प्रतिबद्धता रहेको छ।
राजनीति र सामाजिक सेवाका अतिरिक्त चापागाईं साहित्यिक क्षेत्रमा पनि सक्रिय छन्। उनी सम्पादक, कवि तथा गीतकारका रूपमा परिचित छन्। साथै, गैरआवासीय नेपाली संघ (एनआरएनए) अमेरिकामा दुई कार्यकाल मिडिया कोअर्डिनेटरको जिम्मेवारी सम्हालिसकेका उनी हाल सल्लाहकारका रूपमा आबद्ध छन्।
अमेरिकाको स्थानीय राजनीतिमा नेपाली मूलका नागरिकको सहभागिता क्रमशः बढ्दै गइरहेका बेला चापागाईंको यस सफलताले स्थानीय राजनीतिमा नेपाली समुदायको बढ्दो सहभागितालाई थप उजागर गरेको छ।
