काठमाडौँ । डेंगु संक्रमणको जोखिम बढ्दै गएपछि काठमाडौँ महानगरपालिकाले लामखुट्टेको प्रजननस्थल पहिचान गरी लार्भा नष्ट गर्ने अभियान सञ्चालन गर्ने तयारी गरेको छ।
महानगरपालिकाका अनुसार ‘लार्भा खोज र नष्ट गर’ अभियानको पहिलो चरण यही असारभित्र महानगरका सबै वडामा सञ्चालन गर्ने रणनीति तयार गरिएको छ।
पछिल्लो समय डेंगुका बिरामीको संख्या बढ्न थालेपछि रोकथामका उपायलाई तीव्र बनाइएको महानगरले जनाएको छ।
अभियान प्रभावकारी बनाउन स्वास्थ्यकर्मी, महिला स्वास्थ्य स्वयंसेविका तथा समुदायमा आधारित विभिन्न संघ-संस्थाका प्रतिनिधिलाई तालिम प्रदान गरी परिचालन गर्ने तयारी गरिएको छ।
महानगरका अनुसार यस वर्षको वर्षायाम सुरु भएसँगै डेंगु नियन्त्रणका कार्यक्रमका लागि करिब एक हजार ६५० जना तालिमप्राप्त जनशक्ति परिचालन गर्ने योजना बनाइएको छ।
तालिममा महिला स्वास्थ्य स्वयंसेविका, स्थानीय क्लब, टोल सुधार समिति, आमा समूहलगायतका प्रतिनिधिलाई सहभागी गराइनेछ। तालिम सम्पन्न भएपछि उनीहरूलाई सम्बन्धित वडाका विभिन्न क्षेत्रमा परिचालन गरी डेंगु सार्ने लामखुट्टेका लार्भा खोज्ने, नष्ट गर्ने तथा समुदाय स्तरमा जनचेतना अभिवृद्धिसम्बन्धी गतिविधिसमेत सञ्चालन गरिने महानगरपालिकाले जनाएको छ।