काठमाडौँ । गुणस्तर परीक्षणसम्बन्धी प्रक्रियाका कारण करिब दुई महिनादेखि प्रभावित नेपाली चियाको भारततर्फको निर्यात पुनः सञ्चालनमा आएको छ।
सरकारको निरन्तर कूटनीतिक पहल तथा भारतीय खाद्य सुरक्षा तथा मापदण्ड प्राधिकरण (एफएसएसएआई) ले परीक्षणसम्बन्धी कार्यविधि (एसओपी) मा सहज व्यवस्था लागू गरेपछि पूर्वी नाका काँकडभिट्टाबाट चिया बोकेका सवारीसाधन पुनः भारत प्रवेश गर्न थालेका हुन्।
निर्यात अवरुद्ध हुँदा विशेषगरी इलामका चिया उद्योगमा करिब १२ लाख किलोग्राम अर्थोडक्स चिया मौज्दात रहेको थियो। निकासी प्रक्रिया पुनः सुचारु भएसँगै उक्त चिया भारतीय बजारमा सहज रूपमा पठाउन सकिने अपेक्षा चिया व्यवसायीहरूले गरेका छन्।
नेपाल चिया उत्पादक संघका अनुसार सोमबारदेखि इलाममा उत्पादित अर्थोडक्स चिया बोकेका दुई ट्रक काँकडभिट्टा नाका हुँदै भारतको पानी ट्यांकी भन्सार पार गरी गन्तव्यतर्फ प्रस्थान गरेका छन्।
लामो समयदेखिको अनिश्चितता अन्त्य भएसँगै व्यवसायीहरूले निर्यात प्रक्रिया अब नियमित रूपमा अघि बढ्ने विश्वास व्यक्त गर्दै नयाँ खेप पनि भारत पठाउन थालेका छन्।
