काठमाडौँ । २३औँ राष्ट्रिय धान दिवस तथा रोपाइँ महोत्सवका अवसरमा ललितपुरको खुमलटारमा आधुनिक कृषि प्रविधिको प्रयोग गर्दै ड्रोनमार्फत मल छर्ने र मेसिनको सहायताले धान रोप्ने प्रदर्शन गरिएको छ।
‘जलवायुमैत्री प्रविधि : धानमा आत्मनिर्भरता र समृद्धि’ भन्ने मूल नारासहित राष्ट्रिय बाली विज्ञान अनुसन्धान केन्द्र तथा बाली विकास एवं कृषि जैविक विविधता संरक्षण केन्द्रले संयुक्त रूपमा आयोजना गरेको महोत्सवमा आधुनिक कृषि प्रविधिको उपयोगलाई प्राथमिकतामा राखिएको थियो।
कार्यक्रमको उद्घाटन प्रतिनिधि सभा, कृषि तथा प्राकृतिक स्रोत समितिका सभापति अशोककुमार चौधरीले खेतमा ड्रोनमार्फत मल छरेर गरेका थिए। त्यसपछि मेसिनको प्रयोग गरी धान रोप्ने प्रदर्शन गरिएको थियो।
उद्घाटन समारोहमा बोल्दै चौधरीले कृषि उत्पादन वृद्धि गर्दै मुलुकलाई खाद्यान्नमा आत्मनिर्भर बनाउने दिशामा सरकार अघि बढिरहेको बताए।
कार्यक्रममा राष्ट्रिय योजना आयोगका सदस्य डा. देवेन्द्र गौचनले कृषि क्षेत्रमा नीतिगत व्यवस्था भए पनि संरचनागत सुधारलाई थप प्राथमिकता दिनुपर्ने धारणा राखे। उनले किसान र नेपाल कृषि अनुसन्धान परिषद् (नार्क)बीच प्रभावकारी समन्वय र ज्ञान आदानप्रदान आवश्यक रहेको उल्लेख गर्दै जलवायु परिवर्तनसँग अनुकूल हुने तथा पोषणयुक्त धानका जातको उत्पादन र विस्तारमा विशेष ध्यान दिनुपर्ने बताए।
