काठमाडौँ । जिल्ला काठमाडौँ ललितपुर र भक्तपुरका विभिन्न स्थानमा दर्ता नगरी सञ्चालनमा रहेका १५ वटा कन्सल्टेन्सीका १८ जना सञ्चालकलाई पक्राउ गरिएको छ ।
अनुगमनका क्रममा कानुनी प्रक्रिया पूरा नगरी सञ्चालनमा रहेका १८ सञ्चालकलाई प्रहरीले नियन्त्रणमा लिएको हो । हाल उनीहरूलाई नियन्त्रणमा लिएर आवश्यक कारबाहीका लागि सम्बन्धित प्रहरी परिसरमा पठाइएको प्रहरीले जनाएको छ ।
पक्राउ परेकामध्ये १४ जनालाई जिल्ला प्रहरी परिसर काठमाडौँ , २ जनालाई जिल्ला प्रहरी परिसर भक्तपुर र २ जनालाई जिल्ला प्रहरी परिसर ललितपुर पठाइएको छ ।
कारबाहीमा परेका कन्सल्टेन्सीहरू गुरुबा–स्टडी ग्लाइडर, लेक्सिको एजुकेशन, पास्कल एजुकेशन, एपिटोम एजुकेशन, मेघाटेक एजुकेशन, स्किल पोइन्ट एजुकेशन, भाइब्रेन्ट एजुकेशन, ड्रीम एजुकेशन, युनिभर्सल गेटवे, भिक्ट्री एजुकेशन, २४ घण्टा एजुकेशन, ग्रिनर एजुकेशन, ग्लोबल इम्प्याक्ट, उरेशी एजुकेशन र ब्लूम एब्रोड रहेका छन् ।
