काठमाडौँ । बुटवलमा भूमिहीन तथा अव्यवस्थित बसोबासीहरूले सार्वजनिक जग्गा संरक्षणका नाममा दीर्घकालदेखि बसोबास गर्दै आएका बस्तीहरू वैकल्पिक पुनर्स्थापनाविना हटाउने कार्य भइरहेको भन्दै विरोध प्रदर्शन गरेका छन्।
नेपाल भूमिहीन सुकुमवासी तथा अव्यवस्थित बसोबासी संघर्ष समिति रुपन्देहीको आयोजनामा भएको प्रदर्शन राजमार्ग चौराहाबाट सुरु भएर मिलन चोक, अस्पताल लाइन हुँदै ट्राफिकचोकसम्म पुगेको थियो। आयोजकका अनुसार प्रदर्शनपछि सोही क्षेत्रमा सभाको आयोजना गरिएको छ।
आन्दोलनमा भूमिहीन तथा अव्यवस्थित बसोबासीको उल्लेख्य उपस्थिति रहेका २२ भन्दा बढी जिल्लाबाट सहभागीहरू बुटवल पुगेका थिए। प्रदर्शनका क्रममा सहभागीहरूले सरकारी नीतिको विरोध गर्दै नाराबाजी गरेका थिए। सुरक्षा अवस्थालाई ध्यानमा राख्दै प्रशासनले विभिन्न स्थानमा सुरक्षाकर्मी परिचालन गरेको जनाएको छ।
संघर्ष समितिले विभिन्न प्रदेशमा वैकल्पिक व्यवस्थाविना बस्ती हटाउने कार्य तीव्र भएको आरोप लगाउँदै त्यसको विरोध स्वरूप आन्दोलन आयोजना गरिएको जनाएको छ। समितिका अनुसार हालसम्म देशभर करिब १२ लाख परिवार प्रभावित भएका छन् भने यसबाट झन्डै ५० लाख नागरिक प्रत्यक्ष असरमा परेका छन्।
समितिले लामो समयदेखि बसोबास गर्दै आएका परिवारहरू घरबास गुम्ने त्रासमा रहेको र त्यसले मानसिक तनावसमेत बढाएको दाबी गरेको छ। यही विषयमा सरकारको ध्यानाकर्षण गराउन आन्दोलन गरिएको आयोजकको भनाइ छ।
आयोजकले प्रदर्शनमा ३० हजारभन्दा बढी भूमिहीन तथा अव्यवस्थित बसोबासी सहभागी भएको दाबी गरेका छन्। सभामा सातै प्रदेशबाट आएका प्रतिनिधि तथा अगुवाहरूले आफ्ना धारणा राख्ने कार्यक्रम तय गरिएको जनाइएको छ।
