काठमाडौँ । वैदेशिक रोजगारीमा जाने युवासँग सम्बन्धित गुनासोपछि श्रम, रोजगार तथा सामाजिक सुरक्षा मन्त्रालयले ललितपुरको जावलाखेलस्थित मनु म्यानपावरमा छापा मारेको छ ।
प्रधानमन्त्री तथा मन्त्रिपरिषद्को कार्यालयमा मलेसिया जान लागेका एक युवाले गुनासो दर्ता गराएपछि मन्त्रालयको टोलीले बिहीबार म्यानपावर कम्पनीमा अनुगमन तथा छापा प्रक्रिया अघि बढाएको हो ।
छापाका क्रममा कार्यालयबाट ४३७ वटा राहदानी (पासपोर्ट) तथा रु. सात लाख ९० हजार नगद बरामद भएको मन्त्रालय स्रोतले जनाएको छ । बरामद गरिएको नगद रकमको कुनै आधिकारिक रसिद फेला नपरेको पनि जनाइएको छ ।
मन्त्रीको सचिवालयका अनुसार प्रधानमन्त्री कार्यालयबाट प्राप्त सूचनापछि तत्काल मन्त्रालयको टोली परिचालन गरिएको थियो । अनुगमनका क्रममा कम्पनीको कागजात तथा आर्थिक कारोबारसम्बन्धी विवरणसमेत जफत गरिएको बताइएको छ ।
मन्त्रालयले मनु म्यानपावरलाई सिल गरेर थप अनुसन्धान तथा कारबाही प्रक्रिया अघि बढाइने जनाएको छ ।
