काठमाडौँ । कीर्तिपुरमा एक युवकको हत्या घटनामा संलग्न रहेको आरोपमा प्रहरीले तीन जनालाई पक्राउ गरी सार्वजनिक गरेको छ ।
जिल्ला प्रहरी परिसर काठमाडौँ का अनुसार पक्राउ पर्नेमा अछामको साँफेबगर नगरपालिका-४ स्थायी घर भएका २५ वर्षीय महेन्द्र शाह, कैलालीको बर्दगोरिया गाउँपालिका-४ घर भएका २३ वर्षीय रवीन्द्र धामी तथा कैलालीकै घोडाघोडी नगरपालिका-१ का २२ वर्षीय रोशन बिष्ट रहेका छन् । उनीहरू हाल कीर्तिपुर क्षेत्रमा बसोबास गर्दै आएका थिए ।
प्रहरीका अनुसार बुधबार दिउँसो करिब साढे २ बजे कीर्तिपुर नगरपालिका-१० पोडेटोलमा गुल्मीको धुर्कोट नगरपालिका-७ घर भई कीर्तिपुर ढल्पामा बस्दै आएका २२ वर्षीय विपिन घिमिरे माथि धारिलो हतियार प्रहार गरिएको थियो । घटनामा गम्भीर घाइते भएका उनको मृत्यु भएको प्रहरीले जनाएको छ ।
घटनापछि प्रहरी वृत्त कीर्तिपुर बाट खटिएको टोलीले तीनै जनालाई नियन्त्रणमा लिएको हो । उनीहरूमाथि कर्तव्य ज्यानसम्बन्धी कसुरमा अनुसन्धान अघि बढाइएको प्रहरीले जनाएको छ ।
प्रहरीले काठमाडौँ जिल्ला अदालत बाट सात दिनको म्याद अनुमति लिएर थप अनुसन्धान गरिरहेको छ ।