काठमाडौँ । काठमाडौँ उपत्यकाका विभिन्न क्षेत्रमा रहेका सुकुमवासी बस्ती हटाइएपछि प्रभावित परिवारहरूको अस्थायी व्यवस्थापनका लागि पाँच वटा स्थान तय गरिएको छ।
आज काठमाडौँका बल्खु, वंशीघाट, बालाजु र शंखमूल क्षेत्रमा रहेका अनधिकृत टहराहरू हटाइएपछि त्यहाँ बसोबास गर्दै आएका सुकुमवासीलाई तत्काल वैकल्पिक आवास उपलब्ध गराउने निर्णयअनुसार सार्वजनिक तथा तालिमसम्बन्धी संरचनाहरूलाई अस्थायी बसोबास स्थलका रूपमा प्रयोग गरिएको हो।
व्यवस्थापन योजनाअनुसार विस्थापित परिवारहरूलाई ललितपुरको धापाखेलस्थित टेवा कार्यालय, भक्तपुरको खरिपाटी विद्युत् तालिम केन्द्र, बोडेमा रहेको कृषि विकास बैंक तालिम केन्द्र, नगरकोट खानेपानी तालिम केन्द्र तथा काभ्रेको बनेपास्थित रेडक्रस भवनमा अस्थायी रूपमा राखिने व्यवस्था मिलाइएको छ।
स्थानान्तरण प्रक्रिया अघि बढाउनुअघि प्रभावित व्यक्तिहरूको विवरण संकलन कार्य काठमाडौँको दशरथ रंगशालामा गरिएको छ। सो क्रममा हालसम्म ७२ जनाले स्वैच्छिक रूपमा उपस्थित भई आफ्नो विवरण दर्ता गराएका छन्।
विवरण संकलन तथा समन्वय कार्यमा सहरी विकास तथा भवन निर्माण विभाग, काठमाडौँ उपत्यका विकास प्राधिकरण, अधिकार सम्पन्न बागमती सभ्यता एकीकृत विकास समिति र काठमाडौँ महानगर प्रहरीको संयुक्त टोली परिचालित रहेको जनाइएको छ।
सम्बन्धित निकायहरूले प्रभावित परिवारको व्यवस्थापनलाई व्यवस्थित र समन्वयात्मक रूपमा अघि बढाउने तथा आवश्यक सहजीकरण जारी राख्ने बताएका छन्।
