काठमाडौँ- यस वर्षको मनसुनजन्य विपदबाट सुदूरपश्चिमका दुई लाखभन्दा बढी मानिस प्रभावित हुने अनुमान गरिएको छ।
अछाममा आयोजना गरिएको विपद् जोखिम व्यवस्थापन सुशासन, ऐन, नीति, योजना र कार्यविधि स्वमूंल्याकन कार्यशालामा यो वर्षको मनसुनमा सुदूरपश्चिमका दुई लाख २७ हजार ७३६ जना मानिसहरू प्रभावित हुने अनुमान गरिएको तथ्यांक प्रस्तुत भएको छ।
कार्यक्रममा संघीय मामिला तथा सामान्य प्रशासन मन्त्रालयका वातावरण तथा विपद् व्यवस्थापन शाखाका अधिकृत सन्तोष कुमार खत्रीले प्रस्तुत गरेको तथ्यांक अनुसार सुदुपश्चिमका ९ जिल्लाका मनसुनजन्य घटनाबाट प्रभावित हुने ५२ हजार ११२ घरपरिवारका दुई लाख २७ हजार ७३६ जनसंख्या रहेको छ।
तथ्यांक अनुसार कञ्चनपुरमा सबै भन्दा बढी ३६ हजार ८९६ क्रमशः कैलालीमा ३२ हजार २८०,बैतडीमा ३२ हजार १२४,बाजुरामा ३० हजार ७६६, डडेलधुरामा २९ हजार ५९३, डोटीमा २० हजार ८६९, बझाङमा १६ हजार ९३, अछाममा १५ हजार २१३ र दार्चुलामा १३ हजार ७९६ जनसंख्या रहेको छ। यस वर्ष तीन दशक यताकै बढी पानी पर्ने अनुमान गरिएकोमा त्यसमा पनि सबैभन्दा बढी सुदूरपश्चिम, कर्णाली र लुम्बिनी प्रदेशमा वर्षा हुने पूर्वानुमान गरिएको छ।
विपद्को बेला सबैभन्दा बढी जिम्मेवारी स्थानीय तहको रहेकाले पूर्वतयारीले जोखिम कम गर्न सकिने भएकाले सबै संयन्त्रहरू तयारी अवस्था राख्न सुझाव दिइएको छ।
