काठमाडौँ, १ भाद्र । संयुक्त राष्ट्र मानवअधिकार कार्यालयले बङ्गलादेशमा हालै भएको हिंसामा करिब ६५० जनाको मृत्यु भएको दाबी गरेको छ ।
संयुक्त राष्ट्रसंघले न्यायिक हिरासतमा भएका हिंसा, गिरफ्तारी र मृत्युका घटनाको निष्पक्ष र पारदर्शी ढङ्गले अनुसन्धान हुनुपर्ने बताउँदै हिंसामा ६५० जनाको मृत्यु भएको उल्लेख गरेको छ ।
संयुक्त राष्ट्रसंघले बङ्गलादेशमा भएको हिंसाबारे १० पृष्ठको प्रतिवेदन सार्वजनिक गरेको छ । रिपोर्टका अनुसार जुलाई १६ देखि अगस्ट ४ सम्मको हिंसामा झण्डै ४ सय जनाको मृत्यु भएको थियो । ५-६ अगस्टमा भएको हिंसामा करिब २५० जनाको ज्यान गएको रिपोर्टमा उल्लेख छ ।
संयुक्त राष्ट्रसंघको मानवअधिकार कार्यालयले शुक्रवार जेनेभामा यो प्रतिवेदन सार्वजनिक गरेको हो । रिपोर्टका अनुसार मृत्यु हुनेमा प्रदर्शनकारी, दर्शक, पत्रकार र विभिन्न बलका सुरक्षाकर्मी रहेका छन् । हिंसामा हजारौँ मानिस घाइते समेत भएका छन् ।
धेरै क्षेत्रमा कर्फ्यु लगाइएका कारण जानकारी सङ्कलन गर्न कठिनाइ भएकोले मृत्यु हुनेको सङ्ख्या अझ बढी हुन सक्ने संयुक्त राष्ट्रसंघको प्रतिवेदनले जनाएको छ ।
सरकारले अस्पताललाई जानकारी दिन पनि रोकेको रिपोर्टमा उल्लेख छ ।
बङ्गलादेशमा गत जुनमा आरक्षणको विरोधमा प्रदर्शन सुरु भएको थियो। आन्दोलनका क्रममा सुरक्षाकर्मीले मानवअधिकार उल्लङ्घन गरेको आरोप पनि लागेको थियो ।
प्रतिवेदनमा धार्मिक अल्पसङ्ख्यकहरू विरुद्ध लुटपाट, तोडफोड र आगजनीका घटनाहरू पनि भएका छन् ।
प्रतिवेदनले बङ्गलादेशमा द्रुत रूपमा कानुन र व्यवस्था पुनर्स्थापना गर्न आवश्यक रहेको बताएको छ भने हिंसाका दोषीहरूलाई जबाफदेहिता निर्धारण गर्न आवश्यक रहेको उल्लेख गरेको छ ।
