
लहान, १७ साउन । पेस्तोल बोकेर निर्बाध रुपमा बसमा यात्रा गरिरहेका दुई भारतीय नागरिकलाई नेपाल प्रहरीले नियन्त्रणमा लिएको छ ।
जिल्लाको सखुवानन्कारकर्टी भन्ने स्थानमा सार्वजनिक बसमा यात्रा गरिरहेका दुई भारतीय नागरिक मध्ये एकजनाको साथमा पेस्तोल भेटिएको जिल्ला प्रहरी कार्यालय सिरहाका प्रहरी निरीक्षक दिपक कुमार सिंहले बताए ।
ठाडीबाट लहानतर्फ गइरहेको यात्रुबाहक बसमा उनीहरू निस्फिक्री यात्रा गरिरहेका थिए ।
इलाका प्रहरी कार्यालय महेशवारी सिरहाबाट प्रहरी हवल्दार रमेश सिंहको कमाण्डमा खटिएको टोलीले बसलाई चेकचाँज गर्दा हतियारसहित दुई भारतीय नागरिकलाई नियन्त्रणमा लिएको हो ।
भारतको मधुबनी ग्राम पञ्चायत पिपराही झझरी टोल घर बताउने १८ वर्षका युवकको साथबाट कालो रंगको जीआईओबीयूएस एयर पिस्तोला स्विङ लेखिएको हतियार बरामद भएको प्रहरी निरीक्षक सिंहले जानकारी दिए ।
ती युवकसँगै रहेका अर्का भारतीय नागरिकलाई पनि प्रहरीले नियन्त्रणमा लिएको छ । ३७ वर्ष उमेर पुगेको बताउने अर्का भारतीय नागरिक पनि सोही स्थानका भएको बुझिएको छ ।
के प्रयोजनको लागि पेस्तोल ल्याइएको हो भन्ने अझै खुल्न सकेको छ ।