भक्तपुर, ११ चैत । भक्तपुरको एक पार्टी प्यालेसबाट सामान चोरी गरेको अभियोगमा प्रहरीले दुई जनालाई नियन्त्रणमा लिएको छ ।
जिल्लाको सूर्यविनायक नगरपालिका- ५मा रहेको योयो पार्टी प्यालेसबाट पित्तलको पानस र गाग्री चोरी गरेको अभियोगमा काभ्रेपलान्चोक पाँचखाल -२ अनैकोट घर भई भक्तपुर नगरपालिका-३ बंशगोपाल बस्ने वर्ष २८ को अश्विन लामा र सूर्यविनायक नगरपालिका-८ सिपाडोल बस्ने वर्ष १९ को सुवास तामाङलाई प्रहरीले पक्राउ गरेको हो ।
प्रहरी वृत्त जगाती भक्तपुरबाट खटिएको प्रहरी टोलीले उनीहरूलाई सूर्यविनायक नगरपालिका-६ पाण्डुबजारबाट चोरी भएको पित्तलको पानस र गाग्री सहित पक्राउ गरेर आइतबार सार्वजनिक गरेको हो ।
पक्राउ परेका दुवैउपर जिल्ला अदालतबाट चोरी सम्बन्धी कसुरमा पाँच दिनको म्याद थप गरेर अनुसन्धान भइरहेको जिल्ला प्रहरी परिसर भक्तपुरका प्रवक्ता प्रहरी नायव उपरीक्षक ढुण्डीराज नेउपानेले केटिएम दैनिकलाई बताए ।
