
काठमाडौँ । पूर्वराष्ट्रपति विद्यादेवी भण्डारीले तिहार पर्वको अवसरमा सुख, शान्ति, समृद्धि र उत्तरोत्तर प्रगतिको कामना गरेकी छन् ।
सोमबार जारी सन्देशमार्फत उनले नेपालीहरूको महान् पर्व तिहार पर्वले प्रकृति, मानव जीवन र प्राणी जगतबीचको आत्मीय सम्बन्धलाई उजागर गर्ने तथा दिदीबहिनी र दाजुभाइबीचको आपसी स्नेहलाई अझ गाढा बनाउने परम्परा रहेको बताएकी छन् ।
उनले तिहारसँग अभिन्न रूपमा जोडिएको देउसी-भैलोको परम्परा नेपाली मौलिक संस्कृति भएको उल्लेख गर्दै यसले समाजमा एकता र भाइचारा सुदृढ बनाउन महत्त्वपूर्ण भूमिका खेलेको बताइन् ।
‘देउसी-भैलोबाट संकलित कोषलाई सामुदायिक तथा सामाजिक कार्यमा लगाउने जस्तो असल परम्परालाई हामीले संरक्षण गर्नुपर्छ,’ सन्देशमा भनिएको छ ।
भण्डारीले तिहार मनाउँदा अनावश्यक खर्च, तडकभडक र अशिष्ट व्यवहारबाट टाढा रहँदै मितव्ययी र संयमित ढङ्गले पर्व मनाउन सबैलाई आग्रह गरेकी छन् ।
उनले देश अहिले जटिल परिस्थितिबाट गुज्रिरहेको जनाउँदै तिहारले आपसी सद्भाव, सहिष्णुता र एकताको भावना अभिवृद्धि गर्न सहयोग पुर्याउने विश्वास व्यक्त गरेकी छन् ।
‘हामीबीच रहेका कुनै पनि मतभेदलाई शान्तिपूर्ण संवाद, सहकार्य र जनअभिमतका माध्यमबाट समाधान खोज्न प्रेरणा मिलोस्’ पूर्वराष्ट्रपति भण्डारीले शुभकामना सन्देशमा भनेकी छन् ।
उनले दीपावलीको उज्यालोले सबै नेपालीलाई सत्य, न्याय, सदाचार र मानवीय मूल्यहरूको मार्गमा अघि बढ्न प्रेरणा प्रदान गरोस् भन्ने कामना गरेकी छन् ।