विराटनगर, १२ चैत । सेवाग्राहीलाई ठगी गरेको आरोपमा यातायात व्यवस्था कार्यालय विराटनगर परिसरबाट प्रहरीले १२ जनालाई पक्राउ गरेको छ ।
सेवाग्राहीलाई प्रलोभनमा पारेर दु:ख हैरानी दिएको गुनासोपछि जिल्ला प्रहरी कार्यालय मोरङबाट प्रहरी निरीक्षक सरोज खालको कमाण्डमा खटिएको प्रहरी टोलीले बिराटनगर-४ खार्जीमा रहेको यातायात कार्यालयबाट उनीहरूलाई सोमबार (हिजो) साँझ ५:०० बजे पक्राउ गरेर आज सार्वजनिक गरेको हो ।
पक्राउ पर्नेमा विराटनगर महानगरपालिका-३ का ४१ वर्षीय सञ्जीव कोइराला, २४ वर्षीय राजेश खड्का, २५ वर्षीय गौरवकुमार माझी, ३७ वर्षीय राजु कोइराला, सुनसरी दुहबी नगरपालिका-११ का २७ वर्षीय युवराज लम्साल, विराटनगर महानगरपालिका-५ का ३१ वर्षीय अनिल बस्नेत, विराटनगर-४ का २२ वर्षीय राजीव मण्डल, सुनसरी बर्जु-६ का २७ वर्षीय प्रवीण कुमार थन्दार, मोरङ कटहरी-१ का ३७ वर्षीय भागवत राजबंशी, बुढिगंगा-२ का ५० वर्षीय उदय कार्की, बुढिगंगा-१ का २१ वर्षीय सुनिल दाहाल र विराटन-र ३ का २९ वर्षीय अजयकुमार मण्डल रहेका छन् ।
सेवाग्राहीलाई ठगी गरेको गुनासो आएपछि पक्राउ गरेर अनुसन्धान सुरु गरेको जिल्ला प्रहरी कार्यालय मोरङका प्रवक्ता डिएसपी बेदप्रकाश जोशीले जानकारी दिए ।
