काठमाडौँ । नेकपा (एमाले)का महासचिव शंकर पोखरेलले पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकलाई पक्राउ गर्ने निर्णयको औचित्य पुष्टि हुन नसकेको बताएका छन् ।
उनीहरूलाई हाजिरी जमानीमा रिहा गरिएपछि पोखरेलले सरकारी कदममाथि प्रश्न उठाएका हुन् ।
उनका अनुसार गौरीबहादुर कार्की नेतृत्वको आयोगको प्रतिवेदनका आधारमा गरिएको गिरफ्तारी १० दिनसम्म पनि ठोस कारणसहित स्थापित हुन सकेन । उनले उक्त प्रतिवेदनलाई अपूर्ण र पूर्वाग्रही भन्दै त्यसकै आधारमा गरिएको पक्राउलाई गैरकानुनी प्रकृतिको बताएका छन् ।
सामाजिक सञ्जालमार्फत प्रतिक्रिया जनाउँदै उनले अन्ततः हाजिरी जमानीको उपाय अपनाउनु परेको अवस्थाले समग्र प्रक्रियामाथि थप जिज्ञासा सिर्जना गरेको उल्लेख गरेका छन् ।
यस प्रकरणलाई लिएर पोखरेलले सरकारको कदमलाई राजनीतिक पूर्वाग्रह प्रेरित भएको आरोपसमेत दोहोर्याएका छन् ।
